Auleria Wakudumo

Omupangulindjai Martha Imalwa okwa holola kutya ovaeti voihokolola novanambelewa voshikondo shouyuuki ova pewa eameno la wedwa po. 

Imalwa okwa holola kutya eshi osha ninga okuamena ovaeti voihokolola novanambelelwa vakwao moshikondo shouyuuki sha landula eponokelo li nyanyalifa nefyo lomweeti woihokolola mOndangwa Justine Shiweda. 

Omupangulindjai okwa koleka yo kutya okwa mona okambaapila ka shangwa omatilifo a ningilwa omweeti woihokololo momhangu yaGrootfontein Omaandaxa oo Edina laye itali tumbulwa molweameno laye. Okambapila oka shangwa kutya omweeti woihokolola ina efa oshiningwanima shaNdangwa shi liendulule moGrootfontein. Oonakuninga omatilifo atya ngaha ova twikila tava ti omweeti woihokolola na tuminwe komhangu imwe shaashi vati ovanailonga pamwe naye oshoyo oshiwana shaGrootfontein kashi mu hole. 

Tava ti naye diva omanga inaku lata. 

Imalwa okwa ti ouministeli opamwe nopolifi owa yandja eameno la wedwa po noveli natango tava ningi eenghendabala nghene tava nghonopaleke eameno lovanailonga vokoshikondo shouyuuki. 

Omupangulindjai okwa ti opolifi otai twikile okuninga omapekiapeko a wedwa po kombinga yoshiningwanima eshi. 

Umwe womovanailonga ovo va mona etumwalaka olo moGrootfontein okwa koleka kutya okambaapila okwe ka mona. Okwa ti eshi otashi tumu etumwalaka kutya eshi sha ningilwa omweeti woihokololo waNdangwa otashi dulu okuningilwa keshe umwe ngeenge eameno lavo ola kala inali tulwa moilonga. 

“Ohatu pula eameno okudja koilonga fiyo okomaumbo shaashi ina tu amenwa vali. Ngeno otashi dulika tu pewe eameno la tya ngaho momaumbo, oyeendifo oshoyo okulongifa eengodi dopambelewa ponhele yokulongifa dopaumwene sheli kwatelela koilonga oyo hatu longo,” ta holola ngaho. 

Okwa holola yo kutya opena omujnhu ta feekelelwa okambaapila oko nonande ita dulu okuholola kutya olye pamhito ei. 

Okwa shiivifila yo Kundana kutya ita dulu okukoleka ile a anye ngeenge opena ekwatafano pokati kokambaapila oko noshiningwanima osho sha ningilwa omweeti woihokololo momhangu yaNdangwa. 

“Eshi otashi holola kutya eshi sha ningilwa Shiweda otashi dulu okuningilwa keshe umwe. Katu udite twa amenwa vali ta holola ngaho. 

-awakudumo@nepc.com.na