OSHAKATI – Esiku lyohole ndyoka hali dhimbulukwa aluhe momasiku 14 Febuluali gomumvo kehe, anuwa ihali ndhimbulukwa ashike komukiintu nomulumentu ye li mekwatathano lyopahole, ashike olya nuninwa kehe gumwe. Mboka ya li ya yi moonkundathana noshifokundaneki shika, oya gandja omayiyuvo gawo kombinga yesiku ndyoka, taya thamuna kutya esiku ndyoka otali popi ashike okuholothana, ombili osho wo ekwatathano ewanawa pokati komuntu nomuntu. Omusita gwongeleka yopambepo Cornelia Thobias, okwa popi kutya esiku ndyoka otali dhimbulukitha oshigwana opo shi kale shi holathane.

“Okuholathana okwa kwatela mo ombili osho wo ekwatathano ewanawa pokati komuntu nomuntu. Ngele aantu ye holathane ombili nelago ihali ya kala kokule,” omusita ta fatulula ngaaka.

Maria Simon, omukalimo gwomOshakati okwa ti, oku na aanona yatano, ihe ke li nando onahe yokanona ke kamwe mekwatathano lyopahole.

“Ihe shoka itashi ti kandi na ohole, ondi li mohole naanona yandje, oyo haya etele ndje enyanyu,” ta popi ngaaka. 

Simon okwa ti, ohole oyi li pokati kaamboka ye na ohokwe yoku yi topolelathana.

Ta fatulula kutya ohole ohayi vulu okukala pokati kokanona nayina nenge nahe, aamwayinathana, aashiinda oshowo ookuume.

“Esiku ndyoka oyendji ohaye li dhimbulukwa noku li dhana ashike naamboka ye li nayo momakwatathano gopahole, ihe hasho shi na okukala ngaaka,” ta yelitha ngaaka.

Ta gwedha ko kutya ohole nayi ziilile aluhe momagumbo.

Frans Emvula ngoka ta ti,okwa kala omimvo 10 mohombo okwa ti, esiku kehe kuye esiku lyohole.

“Omukulukadhi gwandje ohandi mu uvitha nawa kehe esiku tandi zi mo megumbo nenge tandi ya mo, momikalo dha yooloka,” ta popi ngaaka.

Ta ti, okuuvitha omuntu ohole itashi ti ashike oku mu pa omagano gopeke, ihe oku mu ulukila nkene a simana kungoye.

“Nonando ku na oshimaliwa okulandela omuholike goye okaleke nenge shoka e hole esiku ndyoka, oto vulu oku mu uvitha nawa momukalo gumwe itaagu longithwa oshimaliwa,” ta popi ngaaka.

Selma Nickodemus moonkundathana naKundana okwa ti, esiku lyohole nali simanekwe ashike ngaashi lya tulwa po, ngaashi omasiku omakwawo haga dhimbulukwa.

“Esiku ndyoka onda hala okupewa sha oshiwanawa shoka tashi nyanyukitha omwenyo gwandje, opo nangaye ndi mone wo kutya ondi holike,” ta po pi ngaaka.

Ta ti, ite shi uvu ko nando, ngele esiku ndyoka olya piti inaa pewa sha, okuza komuholike gwe nenge kukuume ke kopothingo.

Shapwanale Ndjoba okwa ti, esiku ndyoka lyohole ohe li dhimbulukwa pamwe naakwanezimo ye, ookuume ke osho wo kehe ngoka e hole.

“Esiku ndyoka olyo ku ulikilathana ashike nkene mu holathane kashi na kutya olye,” ta ti ngaaka.

Ndjoba okwa ti esiku lyohole olyi na okukala lyu udha ombepo yombili.

vkaapanda@nepc.com.na