Auleria Wakudumo

Omupopiliko wOmbelewa yOmupresidente Jonas Mbambo okwa holola kutya ombelewa yomupresidente inai mona natango eindilo ile epitikilo okuyandja efudiko lepangelo komweeti woihokolola momhangu yaNdangwa Justine Shiweda. 

Eshi osha landula eshi oohandimwe, ovanapolitika novanamadina vamwe va holola kutya Shiweda okwa pumbwa naye okupewa efudiko lepangelo molwoilonga yaye oyo a longa nomolwoupenda okuanya okulonga oulingilingi moshikondo shouyuuki. Mbambo okwa yelifila Kundana kutya etokolo lokuyandja efudiko lepangelo ohali tokolwa kokakomitiye oko haka kala oilyo okudja kouministeli wa yooloka. “Fiyo opapa, inandi mona natango ouyelele washa kombinga yoshinima sha tya ngaha,” Mbambo ta holola ngaho. 

Omupopiliko wombelewa yomupresidente okwa holola kutya ombelewa yomupresidente otai ka yandja ouyelele woludi eli, ngeenge opwe ya sha. 

Ohahende Kadhila Amoomo oku li umwe womwaavo tava pula opo Shiweda a pewe efudiko lepangelo. 

Amoomo okwa tula kepandja laye lokoFacebook kutya Shiweda okwa li ependafule. Amoomo okwa holola kutya epangelo ola dopa okuamena Shiweda onghene nali ninge omalongekido amwe a wedwa po ngaashi okupa ounona vaye oshimaliwa. “Epangelo ola dopa, olu na eameno la kwata moiti olo hali ufanwa oCrime Intelligence Network ashike ola dopa okuamena Shiweda,” a shanga ngaho. 

Amoomo okwa pula epangelo opo li pe nakufya efudiko lepangelo osho yo okukala tali yandje oshimaliwa koludalo laye. 

Onghendabala yokuya mekwatafano naAmoomo ngeenge oku na elalakano lokushangela kombelewa oyo hai ungaunga nomafudiko epangelo kombinga yoshinima eshi inai pondolwa. 

Omupangulindjai Martha imalwa meenghundafana naKundana okwa holola kutya naye ke na ouyelele kombinga yasho. 

Imalwa okwa holola kutya ota ka shiivifa ngeenge opa holoka omalunduluko asha kombinga yoshinima eshi. 

-awakudumo@nepc.com.na