Okwa lopotwa eendudu doipupulu tadi kengelele oshiwana oshimaliwa shavo moshitukulwa shaHangwena.

Edi oda popiwa komupopiliko wopolifi moshitukulwa shaHangwena Warrant Andreas Nghiyolwa onghela. 

Okwa hokolola ta ti moshitukulwa shaHangwena omwa lopotwa oibofa itatu yovanhu hanga va kengelelwa keendudu doipupulu. 

Okwa yelifa ta ti oshibofa shimwe osha lopotwa komukunda Ondobe omanga oibofa ivali oya potwa komukunda Omundaungilo.

Nghiyolwa okwa hokolola ta ti fiyo opapa kape na omunhu a lopotwa a tulwa mokatoo kondudu ashike ovanhu ova dengelwa eengodi keendudu tadi va pula oimaliwa. 

Okwa yelifa ta ti ovanhu vatatu ova dengelwa eengodi keendudu tadi va lombwela kutya ope na omafano avo a etwa kuvo ashike ngeenge inava hala okufingwa nava fute oN$10 000.

“Ovanhu va dengelwa eengodi ova kotoka shaashi ova endelela okudengela opolifi ndele tava lopota oinima ei,” ta ti.

Nghiyolwa okwa ti ovanhu ovo ve na va lombwela opolifi kutya ova dengelwa eengodi keendudu tadi popi kutya odi li komikunda odo da tumbulwa.

“Konima yeedula da pita otu na ovanhu vahapu va ninga oihakanwa yokutulwa mokatoo keendudu ndele tava kanifa oshimaliwa shavo,” ta ti.

Okwa hokolola ta ti eendudu dopaife ode lininga oikengelela shaashi ohadi kongo omafano ovanhu komalungula ndele tadi va lombwela kutya ope na omafano avo e li kuvo nokupula oshimaliwa. 

Omudo 2023 okwa lopotwa ovahongifikola vatatu moshitukulwa shaHangwena va tulwa mokatoo kondudu ndele tava kanifa oshimaliwa shihapu.

Okwa didilikwa eendudu moitukulwa yomonooli ngaashi Oshana, Oshikoto nOmusati de lininga ookalyamupombo.

Natango omudo wa dja ko moshitukulwa shaShana omwa lopotwa omukulupe a kanifa oikombo yaye noshimaliwa eshi a kengelelwa kondudu.

Opolifi oya kumaida oshiwana opo shi kale sha kotoka nokukelela okutulwa mokatoo keendudu. 

“Ovanhu ina ya vali meenghundafana nookalyamupombo. Lopoteleni opolifi ngeenge ta mu lombwela oipupulu kovanhu muhe va shi,” ta ti.

-fhamalwa@nepc.com.na