Abraham Mwanyekange 

Matias Andreas a shivika nawa moshimhungu shongeshefa nedina Panamo, noku li omukalimo womwIindangungu, okwa ti ina hala okumona omushikingalo ile omudani woinyandwa moNamibia ta fi ondjala molwoyeetwa po yaye itai mono omakwafo. 

Panamo okwa ti kape na omwiimbi weengalo ehe mu shi, molwaasho okudja ngaho mo 2008 okwa li a kufa etokolo lokuyambula po nokuyambidida oitalendi yOvanamibia okupitila momikalo da yooloka. “Ondi hole eengalo dopamhepo unene, odo nee da pa nge ndi shakene nanakufya Gift,” Ta ti. Panamo ta ti okwa ka shiiva ovashikingalo vahapu okupitila muGift, nota ti paife okwa longa na keshe konyala omushikingalo Omunamibia. “ Vahapu onda landa oukasheta vavo mouhapu ame handi ke va landifa, vamwe onde va pa eemhito va ndaanise peengeshefa dange novamwe onde va futila va ka ete po oungalo noukaseta vavo”, ta weda ko. Panamo okwa lombwela ovanangeshefa vakwawo opo va yambidide ovaimbi novatoti voinyandwa moshilongo, ta ti oiyangadalwa yavo ohai tungu noha i denge po omalungwenye meenghalamwedjo dOvanamibia. “Ohandi pula komesho nokuvayambidida apa tava nyengwa noku va pa omayele opo va imbe oyiimbomwa tai tungu oshilongo.” Panamo okwa ti ovashikingalo vahapu a longa navo va shivika nawa ongaashi, Gazza, D-Naff, Tunakkie, Shitana, Nakale yaNakale navakwawo vahapu. 

-abbenghilai@gmail.com