Omukulupe weedula 87 womukainhu okwa xulifa konima eshi a lyatwa ndele ta tuwa kongobe pefimbo a li ta shingile eengobe koshiunda.
Oshiningwanima osha ningwa komukunda Enkolo moshitukulwa shaShikoto efimbo loufiku lwopotundi 20h00 mexuliloshivike.
Nakufya okwa tongololwa oye Laker Kakodhi omukalimo womukunda Enkolo.
Omukulunhu koshikondo shokukonakona oimbuluma wopolifi moshitukulwa shaShikoto, omupedukomufala Titus Ekandjo okwa koleka oshiningwanima eshi.
Opolifi oya hokolola tai ti ongobe ei ya dipaa omukulupe oi na katana kashona.
Otaku hokololwa kutya ongobe ei oya kula yombalamana.
Opolifi oya ti ongobe ei oya didilikwa i na onyata molwaashi alushe oi hole okutaataa ovanhu unene tuu ngeenge i na okatana.
Efiku olo omulumenhu ou ha lifa eengobe ina hangika po naashi osha eta opo omukulupe a ka shinge eengobe.
Opolifi oya hokolola tai ti olutu lomukulupe ole lituwa koumatyona vambulavo pefimbo kwa li tava kongo inakulu.