Abraham Mwanyekange
Omamwili Ketemba edina lovashikingalo vavali, Johannes Hamukoto Shilandulwa shaKafute Nakanyakeyadi-Oitya, naMoses Paulus Sixxa Million.
Omamwili okwa yambukile kedu loimhungu, kOkalongo kaHaudano,moshitopolwa Omusati, Komukunda wedina Oneheke. Omamwili okwa fikama komatumbulo Omuwambo eshi a tile “Moshitila mwa dja oxupa shaashi Kalunga omukumbe ye Omuwambo ta ti vali wa pewa
eshila loye kokolola, wa pewa ounyakwa woye u longifa.”
Omamwili okwa tameka okushika eengalo Momudo 2022 koKeetmanshoop koshitopolwa sha //Kharas oko kwa li va ka konga etemo.
“Alushe Konima yedimbuko otwa kala hatu kufa okaradio opo tu ke lideule ponhele imwe ye limwenenena pe na omamanya, twa luka po ostudio yetu. Okudja opo otwa tokola nee tu ye kostudio yo vene,” Omamwili taa fatulula.
Omamwili okwa ti nonande hava shikile pamwe, keshe umwe okwa nwefwa mo kovashikingalo va yooloka, Shilandulwa shaKafute Nakanyakeyadi-oitya, okwa nwefwa mo ku Lieutenant Shitana naKangweson. manga Sixxa Million a nwefwa mo ku-D Kandjafa naMakilla.
Tava holola nee kutya omolwenwefemo olo opo va dja tava imbi eemusika domaludi mahapu, ngaashi okwaito, Shambo, Afro Pop nosho tuu.
Okwa ti momaimbiolo avo ova longa novaetipo voikwelengi yeengalo va yooloka ngaashi Pro Humble, Pro Lagos, Chackibeats, Obeat Oya short, Zomblam, Dj Chronic, navakwao vahapu.
“Shaashi poima pe na omitwe di dule pumbali ndiba oha kufwa olududi, omayele oha e lipewa, do eendunge ihadi wanene omutwe umwe, otwa kwafelwa komanyakwa ovashikingalo ngaashi, Drawer Locosounds, Makilla, Zomblam, Kangweson, Dave SK, Alcovibe navakwao,” Omamwili taa ti.
Omamwili okwa ti kape na eshi ihashi dulika onghee oshiwana nashi xulife po okulitonya ndele tashi tameke okueta po sha molwaashi vati Kalunga iha kwafa elai. “Omushololi iha vene, ye omuveni iha sholola, ino teka omukumo komaudifo onai nomashongo,” taa ti.
Omamwili okwa ti otaa ka pitifa oukaseta vahapu vawa nonande pe na omhumbwe yopashimaliwa, nonghee otava indile kOvasamalia ovanamutimanghenda opo ve va pe evatelo opo ondjodi yavo i twe.