Manuel Tomasi, Manu !Naokuru ǂharugub ǀhonkhoeb ge ǀaokhoen ǀumisa ū tsî tsēkorobe hōǂgāsa ǁîb ǀguib !aromas ose, xawe hoa omaris di !gâi!gâb kōse ge sī-ū. 

Tomasi hîa ǀAeǁgams di Ombili ǁanǁguib !nâ ǁan hâb ge, nē ǂharugub ǀkha 2014ǁî kurib !nâ ge tsoatsoa, ǁnāpab ge ǁîb di dadab ge nē ǂharuguba xu a sîsenǀûs khao!gâ, ǁîba xu a ū!khunis khao!gâ. 

Nē !omkurus hîa ge ǀaokhoen ǂansa mā!kharus ǁkhāsib ase a tsoatsoas ge nētsē ge īǁkhā kai Tomasi, ǂguro ǀgôab ase ǁgâu-aisa marisise nî mû!gâ !khaisa, ǁîb nēsa ge ǁhûi tama hâ i, xawe !ereamsa ūs ase ge mû amaga. 

“Tita ge ǁnā khoeta hîa hoa ǀaokhoena ra kō!gâta tsî ta ge ǁnā-amaga ti dadab di sîsenǀûs ǀkha, nē ǂharuguba nî ū!khuni tsî !kharu-ūs ǀguis ge ge i,” tib ge ge mî. 

Tomasi ge haka !gâsan tsî nau hâ ǀaokhoen tsîna ra kō!gâ, tsîb ge nē !naokurus ǂharugub !nâ-ū ra īǁkhā kai ǁîn di ǂhâsigu !nâb nî dīǀoaǀoa !khaisa. 

Dadasaba xub ge hō ǁkhāsiga omkhâi tsî ǀaro!nâs !aromab ge ǁîba 3ǁî !Harib kōse sī hâ ǁkhāǁkhāǂuisens hîa !naokurus tsî ǀgoeǀhaos xūn disa !khōǂgā hâsa ǀAeǁgams !Omkurus ǁKhāǁkhākhâis Senters tawa ge dītoa. 

Nē ǁkhāǁkhākhâis ge ǁîba ge hui ǀnaib ūhâ ǁkhāsiga ǀāǀā tsî ǂâuǀoasasib !nâ ǁîb !naokurusa sîsenū tsî mātareheb ra maris ǁkhāsiba ūhâ xūna ǁîb ǁama-aona māsa. Tomab ge !kharagagu om!nāpe xūna kuru tsî ra !amǀhao, aiǁgauseb ge !kharaga īsiga ūhâ tāgu, ǂnû-ai!naon, kharob xōkhā ra mā tārogu, xūn sâu!nâhe ǁkhā kān, saran kān 

tsî ǂûsâi!nâ!nā-omdi kāgu tsîna. Nē xūn xab ge mâ-i hoa-e ǁama-ao-i di ǁkhoreb !oagu ǀō-aisase ra kuru, !gōsaseb gaxuse hâs tsî !amku sîsenna dīs ai ǂâisa ra ǂnûise. Nausan ǁgoaǂuina ǂkhari ǂharuguba ūhâs !nâ a ǀgaisa, xaweb ge Tomasa tsēkorobe ǀguixasib ǀkha sîsenna ra dī, !ereamsab ǁîb ǀaokhoen di !gâise hâs ǂnamipe tanihâ amaga. !Gâi!gâibasensats ga ūhâ o, Tomasa ǁkhami re 081 707 3475 tawa.