Auleria Wakudumo
Ekopi loudano wokeemhadi osho yo etanga lomokambaba la shivika nawa oNedbank Newspaper Cup neudo otali ka danenwa modoolopa yaKeetmanshoop moshitukulwa sha//Kharas okudja momafiku 3 fiyo 6 Apilili.
Eshi oshi li oshikando shi- 24 ekopi tali danwa okudja nghene efiyafano lalo la li la totwa mo2001. Efiyafano eli ohali kongolola ovanyanyamaulu okudja keembinga adishe daNamibia okukufa ombinga metanga lokeemhadi.
Omupeduminista mouministeli wehongo, oungoba, omaudano novanyasha Dino Balloti oye a patulula pambelewa oudano woNedbank neudo.
Minista okwa holola olupandu lwaye komahangano opaumwene ngaashi oNedbank okukwatakaneka ovanyasha nokuyambula po oudano moshilongo.
“Efiyafano eli ohali yandje omhito kovaholi vomaudano osho yo ovadeuli opo va tale nokuholola omanyakwa oo taa dulu okudanena eengudu domaudano da yooloka,” Balloti ta holola ngaho.
Balloti okwa indila ovakufimbinga ovo tava ka kufa ombinga moudano ou opo ve shi ninge nelitulemo osho yo okufimanekafana moudano.
“Ongomudani, ku shi kutya elao loye otali ku dilile peni. Oto mono ashike wa hoololwa opo u kale to danene oshilongo,” Balloti ta ti ngaho.
Nedbank Newspaper Cup ohai yandje omhito yovaholi voudano okudja koitukulwa yoshilongo aishe 14 opo va ulike oshitalendi shavo mokapale.
Efiyafano eli ohali yandje yo omhito keedoolopa opo di mone mo oyuuyemo okupitila movanhu vahapu ovo tave ya okudana etanga. Okudja nghene efiyafano eli la hovela, ola yambula po eliko loitukulwa ya yooloka needoolopa.
Etanga lomokambaba otali ka danwa ngaha.
Ongudu ya-A otai ka danwa koitukulwa, Zambezi, Hardap, Omusati, Ohangwena, Erongo, Kunene no//Kharas. Omanga ongudu ya-B tai ka danwa kOshikoto, Omaheke, Kavango East, Otjozondjupa, Khomas, Oshana, noKavango West.
Etanga lokeemhadi otali ka danwa ngaha.
Ongudu ya-A Kavango East, Hardap, Omaheke, Otjozondjupa. Ongudu yaB otai ka danwa kOshikoto, Ohangwena, Kavango West, no//Kharas. Ongudu ya-C otai ka danwa koitukulwa Khomas, Erongo, nOshana omanga ongudu ya-D Zambezi, Kunene nOmusati.