Bravery Kabula

Namibiab di Ministeris ǂUrusib tsî ǀHûhâsi !Oabadi dis ge ǁawoǁawo tsî ge mî, ǀguis khami ī ǁōhâ soro-i hîa ǀaokhoen xa ǂanǂuihe tama i tsîn !hūb a ǂhabase hâ ǂHanub di ǁōhâsorodi !khai!khai!khaigu !nâ a ǀkhai !khaisa. 

Ministeris di mîgowaba-aob, Walters Kamayab ge ge mî, nēsi ǂhanub !khai!khai!khaigu !nâ !hūb a ǂhabase ūǀgarahe hâ sorodi, ǀnai ǀaokhoen xa ǂanǂuihe hâ tamas ka i o ǂhanusi ǁgaragu !oa a mîǁguisa ǁaeb soro-i ǁnāpa nî hâs diba noxopa !kharu tama hâ !khaisa. 

Nē ǂanǂansa mā!kharus ge, dā!harodi hîa ge ūhedi, kurigu !oede di ǁōhâ sorode ǀaokhoen xa ǂanǂuihe tama is xa gere !aromahese ǂHanub di ǁōhâ sorode !khai!khai!khaib !nâ gere ǁgoes di ǁgoaǂuisa oresa hōbas ase ge ūhedi ra sîsensa ǁgausa. 2023ǁî kurib !nâs ge ǀAeǁgams Sentrale ǀAeǁgâub ǂHanub ǁōhâsorodi !khai!khai!khaib tawa 200 xa a !nāsa sorode, ǀnîdi âdi ǂomxa kuriga ǁgoese ge ūǀgara hâ i. 

ǂGui !gôab ge nēpa xu ǁōhâse ra !naen tsî !naes ǀkha ra ǁō îaron di ge ī i tsî nau di ge kaikhoen hîa ǂanǂuihe tamase ge ǁgoe in dide. 

!Kharu ge !nurigu !nâ ǁkhāti ge !khōǂgāsa in ge ǀawas ǀkharigu hîa Ohangwenab, Oshanab tsî Oshikotob hâgu !nân, mâisana !gomma gere tsâsa nē ǁōǂoahâ sorodi ǀaokhoena ǀhao-ūsa in ǁîn ǀnamsabena !amkuse ǁkhō ǁkhā.

Mâisan ra mîsa !oa-i ge soro-e ǂanǂuihe tamase ra !gara!āhe, ǀaokhoen ǂherexa tama ǂanǂuis !aroma tsîb ga mîǁguisa ǁaeb nē soro-e !aruǀî ūǀgaras diba a !gû!kharu ǁaeb aisa. 

Hanas nē sorosa, ǂanǂuihe tamase nî !gara!āhes kara, o-i ge ǂhanub ǀkhāba xu ǁguisa ǁgaragu !oagu nē sorode ra ǁkhōhe. 

ǂAnǂuihe tama sorodi ge kaise kai !gomma !khai!khai!khaigu ai gere ūhâ, aiǁgauses nēsa ǀasase ra hā sorode sâus soaba gere ū tsî ǁkhāti sorode nî kō!gâse īs, ǁgai di tidegas !aromas tsîn ǂnamipe. 

ǁŌhâse tamas ka i o !naes ǀkha gere ǁō îaron, tsî ǂgaoǀkhāsa sorosi!gomma ǁkhōhes !aroma gere dīǀoaǀoan di ǀnî ǁgûn, tsîn ge nē sorode hā ūǁnâsa marin !gomsigu tamas ka i o ǀnî !gomsin !aroma dī tama gere ī.