ONGWEDIVAS – ǂNamipeb tsî !Narisarimas di ministeris ge nē ǁkhâb !nâ ǀasase ge ǂnuwihe !khaib, ǀawona ǁkhawa sîsenūs !aroma ǀgoeǀhaos tsî !aubǀguruna ǁkhaubas ǂnamipe nî hâ !oabadi nî hō!gaohe !khaidi tsîna, Etosha !Hū!nāsi ǀGuru!hanab !nâ ǂhanusise nî ǁkhowa-am. Ministeris di mîgowaba-aob, Vilho Hangulab ge mîsa !oab ge nē ǂâi!nâǁguisa ǁâudība, 28 ǀKhūkhâb dis ai Ombika ǂAi!gaiǂgāb hîa ǀguru!hanab !nâ ǁgoeb tawa nî dīhe. 

Nēb ge ǁnaetisa ǁaxasib ase hâ tide xawe, ǂhâǂhâsa dā!harosa !aubǀguruna ǁkhaubas ǂnamipe ūs di ǀgaiǀgai!nâs ǀgaugu di ǀguib ase ga mûhe, ǀawon hîa !aubǀgurun ûiga ǁkhōǁkhōsasib !nâ ra mâin ǂnamipe, !gōsase Namibiab !aroma a ǂhâǂhâsa ǀguru!hanagu !nâ. 

“ǂHanusi ǁkhowa-ams ge ǂNamipeb, Haiǂgās tsî !Narisarimas ministers, Indileni Daniels xa nî !khōdanahe. 

Ministersa nî mâxōǀkhān ge Duits!hūb !hūǂnûǁkhaeba-aob Namibiab !nâb, Thorsten Hutteri, Direkter Xenerali !Hū!nāsi ǀAweǁguib !Nans dib, Kaire Mbuendeb tsî Namibiab !Hū!nāsi Direkters, KfW Omkhâisens Marisâuǂgaes dis, Beatrice Luckes hâna,” tib ge Hangulaba ge mî. 

ǀAsase ra ǀhui-amhe !khaidi ge !aubǀgurun !ûi-aona ǁnāti !gâi !khaina nî mā, ǁnāpa xun nî !ûi!gâs di sîsenga dīse. 

ǁKhātis nēsa ǁîna nî supusupuba, !haesen ǀhôakao ǁaxasin ai nî oe-am tsî ǂōrisase ǁîn !ûi!gâs sîsenga nî dīsa, !gōsase mā-ams ose ra hâ !audi khami. 

“!Aubǀguruna !ûis ge kaise a ǂhâǂhâsa, aiǁgausen ǂkhoan, !napan tsî xamn tsîna Namibiab !huis xūn ǀumis di !âba ra dīǂui tsî ǂgui !gôagu di !auga!hūsi sari-aona kurikorobe Namibiab ǁga ra ǂgaehā-ū amaga,” tib ge ge mî. 

Ai!âb ge mîs ge, !narisarimas kaise kai !âsa sada !hūb di sâuǁkhāsib !nâ ra ǀhurusa, sîsenga ǂnuwis !nâ hui tsîs !hū!nāsi ǂharuguga ra ǂkhâ!nâ xui-ao. 

“ǀAwon hîa plastik ǂkhoron, dōn, ǂhawen tsî ǂû!gauhe ra ǂûna !khōǂgā hân din ge sari-aon tsî sîsenaon xan ǀguru!hanab !nâ ra aoxuhepa xu ǀhaoǀhaohe tsî !amku tsî ǀgau hâse ǀasa ǀawon !khaib !nâ nî ǀgoraǂgāhe”. 

Nē ǀgaub !nâb ge ǀguru!hanaba !anuse ūhâ tsî !aubǀgurun tsîna ǁkhōǁkhōsase a ǂkhôadī ni ǁkhā xūna xu nî sâuhe, tib ge Hangulaba ge mî.