Ndeyapo Sheende omunamido omi-22, okwa ti oku li telihongele ohoungifikola kushimwe shomoiputudilo yopombada moNamibia, nongeenge a dimbuka oha ka denga ongeshefa yaye okuwapaleka nokuninga eemhafu. 

Sheende okwa ti eshi she mu fininika a kale ta longo oilonga yoludi eli, osheshi kutya naye okwa hala okukala e na onghalamwenyo ya fa younona vakwao, ashike ye okwa hala okulongifa oimaliwa yaye mwene ya dja meenghono daye, no inai dja poima pa patekena ile puhe na elandulafano. 

“Olweendo lokuninga oukadona vakwetu eemhafu onde litameka mo 2023, nosha kala lela tashi endele nge nawa okudja opo,” ta ti. 

Sheende okwa twikila nokuyandja efimano lokuninga ongeshefa, unene kovanafikola ava ve li koiputudilo yopombada, shaashi efimbo limwe haalushe omunhu hodulu okuwanifilwa po eemhumbwe doye okudja keumbo. 

Okwa twiki la kutya okuninga ongeshefa, ove to i kofikola kashi fi oshinima shipu, ashike ohashi pula elitulemo, elininipiko, nokutula onghalamwenyo yoye komesho, osho yo okuhadimbwa eshi she ku endifa. 

Sheende paife oku li ta wapaleke oipala moWindhoek, omo nokuli ongeshefa yaye ya kula noku li yo ta yandje omadeulo meni osho yo kondje yodoolopa. 

“Ngaashi omwedi ou ohandi ka yandja omadeulo konooli meedolopa ngaashi Ongwediva, Ondangwa osho yo Oshakati,” ta ti. 

-taimihaihambo2000@gmail.com