Auleria Wakudumo
OSHAKATI- Eshi oshilongo sha dimbuluka efiku lemanguluko Olomakaya, efiku ola li la mwenyekwa keengudu domaudano dopamufyuululwakalo novashikingalo ofulundudu.
Omanyakwa mokudana nomokwiimba inaa fiya nande oumwe koshipundi eshi ali taa imbi, okudana, okudenga ondingolo oshoyo okunhuka omupembe nokusaka fiyo opedu.
Moshitukulwa shaShana, efiku ola dimbulukwa mokapale komaudano mOshakati. Eengudu dopamufyuululwakalo dili hamano, imwe yokudaanisa, imwe yokwiimba oshoyo omushikingalo umwe ovo vali va mwenyeka efiku eli. Ongudu yopamufyuululwakalo younona yedina Etokotoko oyo ya patulula okapale. Ongudu oya mona omhito okutambula ko omuprima woshilongo eshi a fika mokapale mOshakati.
Konima yoipopiwa ishonaelela, Nashikoya okwa nhukila modabo, taku shikula Beata Akawa oo ali ena ovamati noukadona tava dana moshili. Ongudu imwe yali ya ufa ovanhu koipundi oyo ‘The Regional Multi-Culture’. Ei ongudu ina omihoko da yooloka odo deli hanga moshitukulwa shaShana.
Ongudu oina Ovadamara, Ovakavango oshoyo Ovazambezi, Ovawambo nOvaherero.
Omuprima okwa li a shambukwa mokutala oukumwe pokati keengudu adishe edi. Voo, ova imba nokudaanisa oidano yomifyuululwakalo adishe.
Natango, ongudu yovahongwa vena ounghundi wokupopya Eluwa nayo oya hafifa vahapu nodaanisa yayo yeengalo doshiSouth Africa.
Konima, omalihafifo okwa patwa kongudu yokwiimba yomoshitukulwa oshoyo omushikingalo nedina la shiika nawa Mbuku oo ali ta tondoka nokapale akeshe opo a hafife aveshe ovo vali moipundi yokapale.