Katima Mulilo- Ndango zodoropa zaKatima Mulilo ngesi vana manamo mokuvatera vatungimo modoropa ava runa gumu unene ruhanzo, konyara vantu wokusika ko 310 vakadi novanona nare vana vagusapo pevango lina kara vavatware nye oku kwakara asi kapisi ureru kusikamapo mema.
Elikwamo eli lyokuvadirura kwatameka ketameko tupu lyokwedi kwaMurongankuru, konyima tupu apa nye mambo, aga gakara asi kwagadika mevango vatura asi lyokudika, kwahanzera morwa mema goruhanzo nomvhura nye ezi zonene zaroka modoropa. Mukurona godoropa Kabende Kabende kayinkondopekere apa kazimupuragerere sayitunga za New era asi vatungimo wonomukunda ngwendi Choto, Cowboy, ntani Dairy awo kuna vagumu, omu yina kara asi kuna gumu mambo gomanzi unene.
‘’ Ose tuna rugana yoyinzi unene, omu tuna damuna vantu wovanzi pomavango gakara asi kuhanzera mema.
Dogoro ngesi vakadi novanona wokusika ko 309 vana vadirwire kevango lyewa, ano yirugana kwakugenda nawa omu natupopera vantu vetu ,’’ yimo ana kutanta Kabende.
Ano yokuvhura nye kuvapa valivatereseko nayo, yiyo nye yina kara udigu wounene, nampili ngomu yina kara asi nombatero kuna kuwiza.
Red Cross zomoNamibia nawo vamwe vana wizamo vana kugavako mbatero ezi zina kara ngesi hepero unene, ezi tuna kundindira ziyasike. ‘’ Ose kuna kupandura mbatero ezi tiuna kugwana zokutundilira koRed Cross Namibia.
Mauhwi aga vana kugava apa tuna kuhuyunga ngesi kuna kara moVenduka, marongikido ngesi kuna kutwima nokugamanesa yipo varete uhwi ou koKatima Mulilo yipo vayayigavere, yimo ana kutanta Kabende.
Ndango zodoropa kwakuruganena kumwe nokomitiye ezi zakarapo zomaudigu gopamunkama omu nye navakeverera asi nkennye mbatero vana kugwana zahepa kuzigava kovantu owo yina tamba nokutara asi vana yigwana owo vanayitambesere.
‘’ Mokupitira nye mokomitiye zorukukutu zopamukunda, ose twahepa kuyitara asi vantu vana kunyanda vahepa kugwana mbatero moomu yawapera nanayinye oyo vana kugwana, yimo ana kutanta.
Nampili ngoso mavango gomatungo gomawa simpe vana gapumbwa.
Nonzira dononzi domodoropa nado ngesi dina zonauka morwa mvhura ezi zina roko zonene, yina kuninkisa asi kudiwapukurura tadikwata siruwo.
‘’ Nampili ngoso, mpepo zondona tuna kara nazo kuna kuninkisa tupire kuwapukurura nonzira edi. Apa nye nazikara asi mpepo zina litjindji zina wapa, hawe natuliwapayika nye tuwapukurure nonzira detu,’’ yimo ana kutanta Kabende.
Mokuza nye komeho, mokutara asi ngapi natugwana mbatero zonokasayise yina kara ngesi asi udigu tuna kara nawo, ndango ngesi kuna kara asi vahepa kutura mosirugana mema ndi mavango nye gokuza mema gomadona ntani matungo nye ngoso.
‘’ Evango nye eli lyokutekura mema kuna kara asi projeka ezi kuna kugendapo nawa.
Ose kuna kundindira nye projeka ezi zitameke mokwedi kwaKudugona ndi katemeko tupu lyaKudumonkuru.
Projeka zangesi hawe nazivatera unene ngwendi kononzugo dokulivaterera, makura ose tulituremo nye mokutara asi ogo mema gomadona simpe tugaruganese moomu tupu zina kukura doropa zetu,’’ yimo ana kutanta Kabende.
-anakale@nepc.com.na