Dalene Kooper

Vane varugani womoMetro moMariental kavavapere asi vahepa kulifutire N$3000 moutano kompanguro zomoMariental, konyima tupu opo kavavakwete sivike sina puko omu vana kuvagazarera asi kwavaka mositora yininke yamo yokusika ko mulyo goN$24 000. Owo nye vagazarerwa kavapwege modorongo kuna kara Richard Ralph Tjomb, Zembrahno Bikeur, JessicaLudewyk ntani Brown lee Coetzee. Vagazarera ava kuna vatamba marapoto gowidi. 

Sipangura sawo kuna sirundurura nye dogoro mo 22 Pembagona 2026 omu simpe vana kurugana makona kono. Vagazarerwa ava kwanyatera yimbapira eyi yina kara umbangi asi vafuta moyikando yoyinzi kutunda tupu mokwedi kwaMurongagona dogoro Nsinano mvhura zeezi. Yimbapira youmbangi eyi kuna kara nye asi awo kwaranda nondja domulyo gokusika ko N$24 844.86 nye oyo yininke vatjanga poyimbapira kapi yakasika nampili nakauke oku vayitambesera. 

Mokukwama nye vaporosi vakara asi womakonakono goukorokotji, nondja nonoh=nhunhwa ntani Omaere, oshikandela nomuhaka nayimwe ngoso. Nondja edi kapi vadifutira nampili nakauke. Metro zomoMariental cash and carry awo kuna kara noumbangi womafano gagumwe Tjombe, ogu ana kara asi mukevereli gevango olyo, omu nye ana kugava nombudi ndi mauzera kovaporosi. Vaporosi vaNamibia kavazigidire Tjombe vakamupuragere epuragero kalikereko moutatu. Age makura kumwe nokuretamo vakwawo vatatu nawo vahamenemo mosimpagwa sangesi, eyi kayitwarederere dogoro moune navenye owo katumbwire vavakwate. 

Mugazarerwa gwauvali, Bikeur nomukarelipo gwendi, katente asi Tjombe kayirugene eyi gelike owo vakwawo awo kwasikisamo yirugana yawo. Mukwatelimo govaporosi womakonakono momukunda gwaHardap, Charles Goagoseb, kankondopekere ekwato, nokutanta asi kuna kara sirapotwa sovarugani vaMetro vanayatjangesa. ‘’Vaporosi vana kwata varugani vamwe wokositora saMetro. Metro dogoro ngesi simpe kwato eyi vana gwana koyo yazumbana ndi vavaka ndi yimaliwa, ano makona kono simpe kuna kuza komeho,’’ yimo ana kutanta Goagoseb. Metro mukurona gwawo gakererapo maudigu Raymond van Rooyyen katente asi simpe kapi vana siki posiruwo sokukumbururako kosihorokwa sangesi, nokutanta tupu asi kwato nkumbu’’. Vagazarerwa ava apa tuna kuhuyunga ngesi hawe nare vana vahagekesa yirugana kokampani ezi zaMetro dogoro komeho oko, kukwama nye asi yininke ngayikatundamo momakonakono nagenye. 

-dalenemediamarketing@gmail.com