Fiyo opapa omalishangifo oshimaliwa shokutameka ongeshefa okudilila kepangelo, oo a shivika nawa pambelewa nedina National Youth Development Fund, okwa patuluka nakeshe Omunamibia a wanifa po oipumbiwa yomalishangifo okwa manguluka okukala a hadeka.
Omunhu keshe opo a kale a wanifa okuhadeka oshimaliwa eshi, oku na okukala Omunamibia kuhadi e li pokati keedula 18-45.
Na kale e na ongeshefa tai longo nale, nongeenge ke na, na kale a shangifa ongeshefa yaye ei ahala okutameka nayo ko-Bipa, ye ta shikula omilandu adishe nokutalela po eembelewa edi e na okweenda ngaashi oNamfisa osho yo Namra, opo a kale a wanifa po oipumbiwa yokukupewa oishimaliwa eshi.
Oimalwa ei otai ka yandjwa kovakwashiwana ve livatele okutameka eengeshefa davo, ashike konima yefimbo, omukuli ou wa pewa kepangelo u tameke nao owa teelelwa u ke u fute okudilila mongeshefa yoye, opo u dule oku yandja omhito kuvakweni navo va dule okumona omhito yokufutilwa.
Omuprima woshilongo Elijah Ngurare okwa yelifa kutya ei omhito iwa kovanyasha, nova pumbwa oku i longifa opo oimaliwa ei iha shune moshikefa shepangelo inai longifwa.
“Oimailwa ei itai ka yandjwa she li kolelela kopolotika ile koutongotongo, ndele otai ka yandjwa ashike shi li melandulafano,” ta ti.
Ngurare okwa ti eshi otashi ulike elitulemo lepangelo mokuyambidida oshiwana unene ovanyasha vahapu ava inava dula okuya komesho osho yo kokule nehongo va dule oku linyangela.
Okwa ti ngeenge ovanyasha ova kala ve lipyakidila neepoloyeka, otashi ka shunifa yo oimbuluma moshilongo pedu, unene ei hai longwa kovanyasha shaashi vamwe oluhepo olo ashike hali va shongo va kale oihakanwa yokulonga oimbuluma.
Ngurare okwa yelifa kutya mopaife epangelo ola yandja eemiliona N$257 odo tadi ka tamekwa nado, nokudja opo epangelo otali kala hali yandje eemiliona N$500 keshe kodula di yambidide opoloyeka i dule okuya komesho pehe na omaimbo asha.
Okwa pula yo eembelewa dookansela moitukulwa di yambidide ovakwashiwana mokuhadeka eefooloma domaindilo, v o va fatululile ovanhu nghee ve na oku shi enda opo va wanife po oipumbiwa yavo.
“Fiyo opapa ovanyasha vomoshitukulwa shaShana ova kendabala okulongifa eemiliona N$4, nondi udite kutya ove udite ko lela,” ta ti.
Omalishangifo fiyo opapa inaa popiwa kutya otaa pate naini, ashike okwa yeuluka neefooloma otadi hangika peembelwa dookansela osho yo oongoloneya moitukulwa.