Omupresidente Netumbo Nandi-Ndaitwah okwa talela po oshipangelo shoCentral oshoyo Katutura moWindhoek oshivike sha dja ko, a tale nghene minista wouhaku pamwe noshikondo shaye veli longekidila oshikumungu shoku panga ovanaudu ava vena ee medical aid.
Nandi-Ndaitwah eshi a talela po nokutala apa oipangelo ivali ya fikama nomalilongekidilo ayo oshikumungu sho Vision April 2026, osho shinasha noku kufa ovanaudu hava longele epangelo vaxulife po okupangwa koipangelo yopaumwene, voo vaye kepangelo okwa li a hafifwa koilonga yalongwa ku Minista wouhaku Dr Esparenca Luvindao pamwe noshikondo shaye.
Luvindao okwa ulikila omupresidente oinima ei va dula okulonga po moule wefimbo li xupi lela.
Eshi osha ningwa opo va twife ondjodi nokutameka oshikumungu shoApril 2026, ngaashi omashina oo hai ifanwa dialysis okutala omunhu olutu alishe ngeenge tashiya koilyo yomeni lolutu.
“Omashima aa paife oku li ashike koipangelo ishona. Ashike moule wefimbo lixupi, oitukulwa aishe oina okumona opo tu xulife po omukalo wovanaudu ta veya okupangwa ko Windhoek alushe,” Luvindao ta ti ngaho.
Luvindao okwa yelifa kutya natango ova dula okulanda yo omashina amwe a kula wedwa po, oo nao haa pange omikifi da yooloka.
Minista okwa ti eshi otashi keva kwafa lela unene tuu moshikumungu eshi shipe ngaha.
“Otwa dula yo okumbestela omiti da wana lela. Otwe shi ninga moule wefimbo lixupi oshoyo kondado ili pedu eelela shaashi otwa landa sheevene, ina tulongifa eetendela,” Minista ta holola ngaho.
Luvindao okwa weda po ta ti natango omashina aa valanda ovalongifa eemiliona dishona.
Okwa ti eshi oshe va xupilifa po nasha moshikefa shouministeli opo va dule okuwanifa po eemhumbwe da pumbiwa koipangelo ya yooloka.
Luvindao okwa ti omakwafo aa haa yandjwa koipangelo yopaumwene, oo ngaho a teelelika aka yandjwe koipangelo yepangelo novakwashiwana ina va pumbwa okukala va tula omitwe komapepe shaashi aishe oya longekidwa noili nale peenhele.
Oshikumungu eshi osha li shaudenekwa shi kale shatulwa moilonga okudja mu 1 Apilili 2026.