RUACANA-Minista gwiikwameni, omatembu, egameno nepopilo lyoshigwana Lucia Iipumbu ngoka a li kahewa komaudhano gali ko mehuulilo shiwike koRuacana okwa ti omaudhano ohaga gongaleke aantu nohaga dhana onkandangala unene maanyasha.

Iipumbu dhoka okwe dhi popi sho kwa li ta patulula omaudhano gotonamenda yoRuacana ngoka ga tamekele Etatitano noga hulu ohela. Omaudhano ngoka oga ningwa
oshikando oshi-15. Osipana dhili 99 odha li dha kutha ombinga momaudhano gayooloka, aasindani oya tseyithwa oshifokundaneki shika sha nyanyangidhwa nale. “Omaudhano gatya ngiika oga simana moshigwana, ohaga xwaxwameke wo uundjolowele, go ohaga kaleke aanyasha kokule niinima iiwinayi, onkene osha simana ngele taga kala taga ningwa,” ta popi ngaaka.

Ta gwedha ko kutya uuna omaudhano geli ngiika taga ningwa mondoolopa ngaashi dhika, ohaga yambidhidha wo mekoko lyoshimaliwa mondoolopa shoka hashi yambulitha po noku humitha komeho oondoolopa.

Iipumbu okwa pula wo ngele elelo lyondoolopa yoRuacana olya hogolola ehala lyokutungwa okapale komaudhano keli pomuthika guli hwepo, konima kwali kwa pitithwa oshimaliwa shokutungwa uupale miitopolwa, ashike okwa li a yamukulwa kutya oye shi ninga. 

“Onda pula ngaaka konima nda tala onkalo yuupale tau dhanenwa. Omaudhano ngaka ohaga dhanwa koosipana tadhi zi kiitopolwa yi ili no yi ili, onkene okapale nako naka kale keli monkalo tayi hokitha ,” ta ti ngaaka.

Mayola gwondoolopa yoRuacana Jona Jona okwa ti omaudhano oga enda nawa oku za esiku lyotango sigo  esiku lya hugunina.

“Ina tu lopotelwa sha oshiwinayi sha holoka pomaudhano mpaka nonando omwaalu gwaantu ngoka twa mono ogwa pitilila ngoka kwa li ta tu tengeneke,” ta ti ngaaka.

Nonando opolisi moshitopolwa shaMusati ya kala noku kaleka po elandulathano unene momudhingoloko gwoRuacana moka mwali muna omaudhano, aalandithi yali yena uutala oya pula opolisi yika kale tayi ninge omboloka osho wo okufudhilitha aahingi ko kule nando ookilometa 30, oku za mpoka hapu kala omaudhano oshoka ohaya kala ashike okilo yimwe oku za pehala mpoka, shoka hashi mbandaleke noku tidhitha po ookasitoma dha wo oshoka odha tila okumwangwa po.

Titus Shikongo ngoka ali ena okatala okwa ti, oya pandula opolisi sho ya kala tayi tula po elandulathano ashike okufudhilitha aahingi taya zi mehala tali landithwa omalovu ina shi wapala. “Opolisi oya li ashike ya pumbwa okutula po elandulathano noku gamena osho wo okugandja omakumagidho ihe haku manga po aantu. Ngaaka oya fa yathikama momwelo gwehala lyomanwino,” ta nyenyeta ngaaka.

Shikongo okwa ti omumvo tagu ya aantu yamwe itaye ye ko we koRuacana oshoka oya tila ko. – vkaapanda@nepc.com.na