RUACANA – Eddy Aukongo okwa ningi omusindani dhingi methigathano lyokukwata oohi ndyoka lya li ko mehuliloshiwike lyOpaasa. 

Omathigathano ngoka oga li ko momasiku gane gaApiilili nuumvo, ga ningilwa kehala lyomayinyanyudho tali ithanwa Mavinga Lodge and Campsite, moshitopolwa shaKunene. 

Omukwatelikomeho gomathigathano goohi Joyce Paulus okwa ti shoka okwa li oshikando shotango, notaga kala haga ningwa omumvo kehe. 

“Nonando omwaalu ngoka kwa li twa tega hago gwa holoka, ayihe oya enda nawa,” ta ti ngaaka. 

Paulus okwa ti omumvo tagu ya omathigathano ngoka otaga ka ka kala ge vule gonuumvo. 

Okwa popi wo kutya oye ya po noshiindingili shoka, oshoka oya mono aantu oyendji ye hole okukala taya kwata oohi pooha dhomeya, unene pomilonga. 

Ta ti ndyoka olyo etompelo ye ya po nompito ndjoka opo aaholi yokukwata oohi ye ye pamwe, yo ya longathane shoka taya vulu okutopolelathana. 

Aukongo okwa li a holola enyanyu, ta ti okukwata oohi oshimwe shomomayinyanyo e hole, onkene ihashi mu thigi omutumba. 

“Natango omumvo tagu ya otandi kutha ombinga, natango pamwe tandi sindano ishewe,” ta popi ye ta imemeha. Ehala ndyoka lya ningilwa omathigathano olyi li kooha dhomulonga omunene nomwaanawa, lya dhingolokwa wo kuushitwe, ko ku na wo aantu yomuhoko gOvahimba mboka ya mwenyeke wo oshiindingili shoka. 

-vkaapanda@nepc.com.na