!GARO!ĀS CONSTANCIAS – !Khawagas ǀkhāb Namibiab dib ge ǁnaetisase ǂnâsasib !hūb dib tsî !hanaǂgās !aroma a īǁoase a ǂansa, !hana!hūb mâsigu !hanadīb !aroma supu tama amaga. 

Nausab, ǀgui ǂgari-aob hîa ǂNūǂgoaes ǀgūse hâba ǁîb sîsenni !hanadīb diba ra ǁgau, īǁkhāsib hâ !hanaǂgās !aroma ǁnā ǂnâsa tsî īǁoase ra mûsen ǂnamipegu !khawagas digu !nâs disa. Frederick Moses Jacobsi ge ǂkhari !hanasa !hanaǂûn !aroma !Garo!ās Constancias hîa ǀnîkhamikō kilometerga ǂNūǂgoaes !auga ǁgoes tawa ge tsoatsoa. 

ǁNāpab ge kaise !amkuse a ǁguiǂuisa ǀgaub !nâ guavan, mangodi tsî ǀkhurulemun haide ǂgā tsî ǀguixasib ǀkha ra !hanadī. 

Nē !garo!ās ge hiodi !nae!khais ǁîn ǀaokhoen disa tani hâ. ǁÎs ge Jacob di îb xa ge ǀhonkhoe-aihe hâ i tsîb ge ǁîb di ǁōǂoas khao!gâ oahā tsî ǁgûra di ǀumisa ge !kharu!kharu. Jacob ge ǁîb taras, ôasakha tsî ǀuiǁgûb ǀkha nē !garo!ās ai!gûs !aroma ǀhûǁare hâse ra sîsen. 

ǀGaisasedi ǁgoaǂuide nē ǂnamipeb !nâ hâ, xawedi ge ǂûhaide ǂnûi-amtsoatsoa tsî ra ǀomkhâi, ǁguiǂgāsens tsî tsau tamase sîsens !gâi!gâba a hā-ū ǁkhās di ǁgauǁgaus ase. Jacob ge mîs ge, 

Ministeris ǂNamipeb, Haiǂgās tsî !Narisarima-aon di beros ǂNūǂgoaes !nâ mâsa xun ge nē projeks !aroma !khomn di huiba a !khō!oasa, !hanaba khoraǂuis !aroma. 

Noxopab ge !kharaga ǁgoaǂuidi ǀkha ǂnôa, aiǁgauseb ǁîba a kai !gomsib ge nē ǂûna, anin xa ǂûhesa ǁkhaubasa, ǁîn ra ǂnûi-amtsoatsoan ra hîa ǀnai hapu ni amaga. 

“Tita ge ǀûide hōs ǀkha !gomma ūhâ,” tib ge ge mî. Hōǂgās âba ǀgaiǀgai!nâs !aromab ge ǁîba ǀoro !gôab di ûitsamaxūn tsîna ǂgari hâ, tib ge Jacoba ge mî. !Hanaǂûn di !amkuse ǁansan !âuhâ soab ain ǁîna nē ûitsamaxūna xu ra ûi !khais ge kai huib ase ī. 

ǁÎb ra mîsa !oab ge ǂgariba tsēsa xu tsēs ǁga ûis ai ǀgui !ammâisa tama hâ, xawe aitsama mâbasens !aromas tsîna ǀgaisa !âsa ra ǀhuru. “Kaise a ǂhâbasa !khais ge, sats tsîn aitsama xū-e ga dībasensa, hoaǁae !gaesendi ǀkha ǀgui ǂnûs di soas !nâ,” tib ge gere ǀawemā. 

!Goaxa ǁaeb di ǁkhoreb Jacobi ūhâb ge, !hanaba kaikai tsî ǂûn âba ǀgūse hâ !ādi !nâ ǁamaxusa.