Oshikonga shokukonaakona omikithi dha yooloka molutu osho wo okugandja omalongo kombinga yuundjolowele, osha pondola okukwathela aantu ye li 678 muule womasiku gatatu moshitopolwa shaMusati.

Oshikonga shoka osha li sha longekidhwa kehangano lyuuhaku tali ithanwa DuneSeven Medical Centre osho wo One Economy Foundation, mekwatelokomeho lyandohotola Elifas Shapumba. Momasiku moka gatatu, oshikonga osha li sha talele po omikunda dhi li popepi nondoolopa Outapi, noshigwana osha li sha mono omayakulo ya kala ya hala uule wethimbo. 

Omukwatelikomeho Shapumba okwa ti oya longekidha oshikonga shoka opo ya fale omayakulo popepi kaantu mboka ihaaya vulu okuthika kiipangelo omolwomatompelo ga yooloka.

“Otwa li twa konaakona omikithi dha yooloka oshali, noku gandja omalongo osho wo uuyelele taya pumbwa konima yomakoonakono osho wo nkene yena okukwatela po uundjolowele wa wo,” ta fatulula ngaaka. Shapumba okwa ti mboka yali ya monika ya pumbwa omayakulo gomeendelelo oyali ya tuminwa kiipangelo inene yaka mone uuhaku wa pumbiwa.

Ta ti, oshikonga shika hasho sho tango ya ningi, oya tamekele momumvo 2023 mOshana osho wo nErongo.

Omunambelewa omukuluntu goshikonga shoka Jonas Taddeus okwa pandula epangelo sho lya dhana onkandangala okufala omahala guuha popepi noshigwana.

“Ota tu tsu omukumo omahangano guuhaku opo ga longele kumwe nepangelo opo ya kale taya ningi iikonga ngaashi mbika, opo ku vulwe okuyambidhidha mboka itaavulu okuthika kiipangelo yaka konaakonwe,” ta pula ngaaka.

Aakwashigwana mboka yali ya yakulwa okupitila moshikonga shoka oyali ya gandja olupandu oshoka osheya kwathela noonkondo, oshoka anuwa ka kwali yeshi mpoka ya thikama osho wo shoka shili komeho.

-vkaapanda@nepc.com.na