Aantu ye li 203 oya mangwa po sho ya adhika niingangamithi ya yooloka inaayi pitikwa moshilongo. 

Sha ikolelela kuuyelele wa gandjwa komupopiliko gwopolisi moshilongo Kauna Shikwambi, aantu mboka ya mangwa po, omwa kwatelwa Aanamibia osho wo yamwe yokiilongo yokondje. 

“Opolisi oya lopota kutya aantu ye li 193 Aanamibia, Aa-Aangola yatatu, Aatanzania yatatu osho wo Omukongo gumwe,” ta ti ngaaka.

Shikwambi okwa ti, iingangamithi ayihe mbyoka oya lopotwa ya mangwa naantu momwedhi gwaMaalitsa aguke oshilongo ashihe. “Iingangamithi ayihe ya kwatwa ko kopolisi ongaashi Cannabis ngoka ogo ga lopotwa ga kwatwa ogendji, ge na ookilogalama 221,764, Mandrax dhi li 1 155, uusila woCocaine woogalama 21.5, oopela dhokukutha mo omategelelo dhi li 61, MDMA dhi li 14, Mushroom oogalama ndatu osho wo Methcatinone” ta yelitha ngaaka. 

Opolisi inayi lopota kutya iingangamithi ayihe kumwe oyi na ongushu yoshimaliwa shi thike peni. Opolisi oya ti, iingangamithi oyo hayi piyaganeke omadhiladhilo omuntu opo a ka longe iiningwanima inaayi uka.

Tayi kumagidha oshigwana shi hulithe po okulongitha iingangamithi oshoka oya nika oshiponga. 

“Kehe ngoka taka adhika niingangamithi otaka pewa egeelo lye lya gwana,” opolosi ya ti ngaaka. Otaku fekelwa aakwiilongo oyo haya yakele iingangamithi moshilongo, nonando oyeshi kutya inayi pitikwa moshilongo. 

Aanona oyendji oya thigi po oosikola, ya yi momapandaanda, omolwiingangamithi taya longitha. Aanyasha oya hanagulwa po kiingangamithi, neilongo kaye na nalyo, oshoka oonkalamwenyo dhawo oye dhi tula miingangamithi. 

Opolisi otayi kumagidha oshigwana shi kale aluhe tashi lopota mpoka nenge ngoka ta landitha iingangamithi. 

Tayi ti, aantu mboka inaya pumbwa okukala moshigwana oshoka otaya teyagula po aantu, oya pumbwa okukala moondjeedhililo.

vkaapanda@nepc.com.na