Omupopiliko wodoolopa yaNdangwa Petrina Mutikisha-Shitalangaho okwa ti omalongekido omauliko oipindi elelodoolopa laNdangwa aeshe okwa pwa oku longekidwa na aishe oili peenhele.

Okwa twikila kutya ova li va haila otima onomena wina, opo i dule oku kwafa nomalongekido oshitufi, noku tula aishe peenhele pefimbo.

“Ngeenge tashiya peameno lovakufimbinga, kutya nee ovanangeshefa ile ava ha veya oku kufa oku li hafifa ile oku ondola omesho, nalo ola tulwa nale peenhele,” ta ti.

Omivelo ota di ka yeulukilaovakufimbinga moo 23 Apilili omanga ovakufimbinga tava ka pitikwa mo 24 oshali efiku alishe. 

Mutikisha-Shitalangaho okwa twikila kutya neudo ota ku kakala omalihafifo ayooloka okudja ashike kounona ndele fiyo oko vakulunhu.

“Otwa teelela tu kakale tuna omafiyafano okakadona dingi, omaudono ayooloka ounona oshoyo omalihafifo ayooloka ovakulunhu. 

Hano ovanhu veedula adishe ova filwa oshisho,” ta ti.

Justina Heelu umwe womwaava tava ka kala vena outala voku landifa okwa ti omauliko oipindi yaNdangwa oha emu etele ombili yokwenyo. 

“Shima ashike nda udu taa popiwa ngaho, oshili ondi shishi nale kutya osha hala okutya ondjato oya pama,” ta holola.

Heelu okwa twikila kutya natango omhito ei ohai mukwafa adule oku longa oshimaliwa yee adule oku kwafa ounona vaye veli koiputudilo, naava vemu kalela peumbo.

Abisai Thomas oo naye ha kala ta landifa oikulya yokongolo oshoyo omalodu ayooloka, okwa ti ei omhito iwa kuye shaashi opo ashike unene hadulu oku mona efimbo liwa adule oku kwatafana navakwao vepupi laye.

Omauliko oipindi ei owa teelelika atameke mo 24 Apilili fiyo omu 02 Mei.

Minista yomakwatafano oinima yomeni nokondje Selma Ashipala-Musavyi oye teya anangeke oshitufi pambelewa mo 8 Apilili 2026.

Mutikisha-Shitalangaho otai ndile ovakwashiwana vomeni lodoolopa oshoyo vokondje veuye va kufe ombinga voo va hafele pamwe novakwashiwana.-taimihaihambo2000@gmail.com