OSHAKATI – Ovanangeshefa hava landifa oikutu yofaalundu, osho yo ovanhu hava hondjo oikutu momatala aShakati otava nyenyeta tava ti ova lulilwa okulumatwa keemwe odo de liteyele momatala. 

Onghela Kundana okwa talela po omatala kOshakati omo ovanangeshefa va hokolola kutya paife ova ninga po oikulya yeemwe. Ova ti paife ova ninga oipute komaulu nokomaoko eshi va lumatwa keemwe. Okwa didlikwa efimbo e li lodula eemwe da ninga dihapu osho yo pefimbo loutalala. 

Ouministeli wouhaku owa lopota kombinga yovanhu va ninga oihakanwa yokukwatwa kumalaria omanga vamwe ova fya. Odoolopa yaShakati oyo imwe ya didilikwa i na omatala a kula noku li paife poshinanena monooli. 

Omatala aa omu na ovanangeshefa va yooloka ngaashi ovalandifi vombelela, okapana, ovalandifi vofaalandu, ovanhu tava hondjo oikutu osho yo ovalandifi voikulya. 

Eshi a kwatafana naKundana mayola welelo lodoolopa yaShakati, Leonard Hango okwa ti ombelewa yaye oya lopotelwa kombinga yoshikumungu shovanhu tava lika keemwe momatala. “Otwa mbesitela omiti kohaputeka. Omiti ota di fiki moshivike eshi,” ta ti. 

Okwa ti ngeenge omiti oda monika otava ka tameka okupombela momatala meendelelo. Hango okwa ti ovanangeshefa ova fimana shaashi otava kwafele okuyambula po eliko lomodoolopa osho yo okuyandja oilonga kovantasha. Okwa ti elelo lodoolopa lavo ota li twikile okuyandjaneka omayakulo koshiwana. “Oshiwana na shi twikile okukala shina ekwatafano liwa nelelo lodoolopa okulopota ngeenge sha didilika omashongo onhumba,” ta ti. Hilya Mwele a hondjo oikutu momatala okwa hokolola ovanhu ngeenge ve li moshihondjelo shaye va teelela oikutu yavo iwondjwe ohava lika keemwe. “Ngeenge omunhu e li omutumba moshihondjelo oto hange te li nyaye ta lika keemwe,” ta ti. 

Mwele okwa ti eemwe di li momatala aaShakati oda kula shaashi oha di fipi ohonde ihapu. 

Ovanangeshefa komatala ova hokolola tava ova pandula elelo lodoolopa yavo eshi le vatungila omatala shaashi paife otava nyangadala okulonga okamaliwa kavo. 

fhamalwa@nepc.com.na