Abraham Mwanyekange

Ovanamatuwa va koya pomi-30 ova lombwela Kundana ta va ti ehangano lokuhiila omatuwa Profile Car Hire oli na oimaliwa yavo ya fika N$400 000, i li konima okudja mo2021.Ova ti ehanagano okwa li la longifa omatuwa avo momafanekovalulo oNamibia Statistics Agency (NSA) 2021.

Ova ti omatuwa avo okwa longifwa pokati komwedi Novemba 2020 naApilili 2021.

Oovene vomatuwa ova ti okwa li ve na okufutwa keshe komufilo womwedi okudja muNovemba eshi omatuwa avo a tamekwa okulongifwa ndele fiyo opaife oimaliwa yavo inave i pewa.

Simon Petrus okwa ti paife osha uka keedula nhano nghee omatukutuku avo al ongifilwe. “Fiyo onena eshi handi popi naave ngaha nande osipenifa oyo ngaho inatu pewa ko koProfile Car Hire, nande otu pule ko oshili ohaku tiwa ashike oshi li komhangu natu teelele, ngaashi ame paife Profile oku na N$ 58 000 yange,” ta ti.

Petrus okwa ti mopaife ove li monghalo itai nuwa omeva. “Vakwetu vamwe ova hakukilwa komaudu opamadilaadilo, vamwe ove li meendjo itadi pu okufutwa fiyo onena. Oshili nave tu pe oimaliwa yetu efimbo olile nai neenghono,” ta ti.

Petrus okwa ti ova kanifa omunangeshefa mukwao naye e na etuwa laye la longifwa koProfile Car Hire. “Oshietifi shefyo otashi dulika shimwe shomwaayo hatu pitile muyo konima eshi oimaliwa yetu inai futwa nomatuwa etu inaa pangelwa natango,” ta ti.

Mwene woProfile Car Hire Vaino Nghipondoka okwa lombwela Kundana ta ti naye ke udite ombili molwa taku tiwa ehangano laye oli na oimaliwa yovanhu. 

“Otwa tameka okufutako ovanhu vamwe, noshiv ike shadjako otwa futa ko ovanhu va koya po-10. Ngeno ovanhu vahapu otwe va futa ko nale kakele ehangano lo-NSA olo li na oimaliwa yetu oyo kwa li tu na okufuta oovene vomatuwa,” ta ti.

Nghipondoka okwa ti ita dulu okuya moule weefuto molwaashi mopaife ova twala komhangu ehangano lo-NSA. “Nave tu lididimikile ashike, mokafimbo kaxupi ohatu ka kala twamana okufuta oimaliwa yavo aishe,” ta ti.

Omupopiliko wo-NSA Sakaria Iipumbu momudo 2021 okwa lombwela New Era ta ti NSA okwa futa nale oimaliwa yoProfile Car Hire ya fika poN$10 436 145 oyo kwa li ya hupa ko okuya 21 Apilili 2022. “Oimaliwa oyo inai kwatelwa moshikumungu eshi shi li komangu,” ta ti.

Komapulo neudo Iipumbu okwa ti ita dulu okutya ko sha molwaasho natango oshikumungu inashipotokonoka komangu.

Edina *Simon Petrus* ola longifwa ashike mehokololo. -amwanyekange@nepc.com.na