Abraham Mwanyekange
Ovalumenhu vatatu ova mangwa po Etitatu molwomunyeka kwa homatiwa. Omunyeka okupitila komulungu wondjebo owa ningwa Omaandaxa mOndangwa 13 Apilili 2026 potundi 12H35 pomatungilo oMonte Carlo, pongeshefa yo-JSB Betting.
Komufala wopolifi mOshana Commisioner Naftal Lungameni Sakaria okwa ti nakuningwa oshihakanwa omukainhu weedula omi-40, omukalimo womodoolopa yaNdangwa.
Omukainhu okwa li ta ongele oimaliwa koufitola vokubesa opo a dule e ke i twale komatuvikilo ombaanga nokwa li ta shingi okatuwa kehangano lavo efimbo loshiningwanima.
Sakaria okwa ti omukainhu eshi a fika pofitola yavo yo-JSB okwa fikameka otuwa komesho yetungo manga a teelela ou talongo mofitola e mu etele oimaliwa. Ta ti konima eshi a pewa oimaliwa okwe i tula koshipundi shokomesho oku haku ende omutwaalelwa.
Sakaria okwa weda ko ta ti omepakumo leisho, ovalumenhu vatatu ve na eendjebo deembistoli ove ya potuwa omu eli. Omufekelwa umwe okwa ponokela omushingi ndele ta kufa mo okandjato koimaliwa.
Sakaria okwa ti pefimbo opo omushingi wotuwa okwa mona omhito ndele ta faduka po a ka hondama pobotolo i li popepi.
Okwa ti ovafekelwa ova faduka po konima eshi va mona ongudu yovanhu ya uka kuvo. Ta ti ova faduka po nokatuwa kavo oka Golf 6 oko kwa li ke va teelela oshinano shishona okudja poshiningwanima, ta ti kape na nande omunhu umwe amonifwa oshiponga pefimbo enyeko kwa homatiwa tali ningwa.
Oinima ya vakwa po ongaashi, oimaliwa keemuma N$26,071.80, ongodi yo iPhone 13 ina ongushu N$13,000.
Ongushu yoinima aishe okuya kumwe N$39,071.80.
Sakaria okwa ti opolifi oye shi pondola okukwata ovafekelwa aveshe vatatu. “Otwe va kwata mEtitatu, oinima imwe ngaashi ongodi, oimaliwa, eenghaku davo, etuwa olo va longifa oshoyo eembistoli noikuti yado,” ta ti.
Ovafekelwa ova teelelika va holoke komhangu yaNdangwa moule weevili 48 omanga omakonakono opolifi taa twikile.
Sakaria okwa ti omanyeko kwa homatiwa omaludi oo okwa pumba mo moshitukulwa. “Ohandi pandula oshiwana eshi shi na elongelokumwe liwa nopolifi, sho osho she tu vatela opo tu kwate ookalyamupombo ava,” ta pandula.
Sakaria okwa londwela ookalyamupombo ovo ta ti ovo tava twikikle okulonga oimbuluma navaninge omutilo. “Moshana ohatulongo noudinini opo tumone kutya oimbuluma oyashuna pedu,” -amwanyekange@nepc.com.na