OSHAKATI – Aakalimo yomolukanda Uupindi moshikandjohogololo Oshakati West oya holola enyanyu lyawo sho ya pewa uushako wiikulya wu na omalwishi, uusila, omagadhi gokulya, oohi dhomoondooha osho wo oosopa. 

Ombelewa yaNgoloneya gwaShana oya yambidhidha aakalimo yomolukanda Uupindi nuushako wiikulya wu li omi-50, mboka ya tothwa mo yeli lela mompumbwe onene. 

Gumwe gomwaamboka ya pewa iikulya, Megameno Shilunga, ngoka a li a pititha omahodhi omanga e li moonkundathana noshifokundaneki shika okwa ti ke hole okuhokolola nkene ha hupu, opo a paluthe aakwanezimo ye. “Sho to ekelehi omandjandja goohi, ngoka omweelelo gwandje, ihandi ga toka nando. Omapeta gomboga yokiilumbu ogo omweelelo gwandje osho wo iipa yiikombo,” ta hokolola ngaaka. 

Ta ti, mondoolopa yaShakati oye ashike e shi pomahala mpoka ha adha iipa mbyoka, onkene iikulya a kwathwa nayo otayi mu kwathele noonkondo kaa ye komatoto. 

Frans Shilongo naye a li a pewa iikulya esiku ndyoka okwa li a pandula ombelewa yangoloneya, ta ti nkene e yile mOshakati ine shi ningilwa nale. 

“Ondu uvite nawa oshoka iikulya mbika nda pewa kakwa li ndi na oshimaliwa shoku yi landa, onda mona iikulya osho wo omweelelo, otandi pandula,” ta pandula ngaaka. 

Aakalimo mboka ya pewa iikulya esiku ndyoka okwa li ya ligola omanga yamwe taya imbi yu uvite nawa sho ya ningi aanelago, taya ti, hayo ashike ya taalela onkalo ondhigu ihe oya tothwa mo mokati kayakwawo. 

Ngoloneya gwoshitopolwa shaShana Hofni Iipinge esiku ndyoka okwa popi kutya okwa li a nyangele oshigwana she komunageshefa gumwe, opo a yambidhidhe aakalimo ye mboka ye li mompumbwe unene. 

“Otu na oshigwana oshindji sha taalela uupyakadhi wokwaa na iilonga sho osho shoka nda kutha onkatu opo ndi konge mpoka tandi vulu okumona omayambidhidho ngaashi ngaka tu kwathe mboka ye li unene mompumbwe,” ta fatulula ngaaka. 

-vkaapandanda@nepc.com.na