OMUSATI- Ofikola Uahekua Herunga Primary School oya yambididwa eshi ya tungilwa ongulufikola osho yo onduda yokutuvikila, nelalakano lo ku kwafela ovanafikola ve li honge nondjungu.
Ofikola oya yambididwa kehangano leeshi la shivika nawa Okalongo Constituency Fishing Pty kongushu yoshimaliwa oN$300 000.
Ongulufikola ipe oya patululwa pambelewa komupedu minista mounisteli wounamapya nounaimuna, omeva, eeshi nomatalululo omadu, Ruthy Masake. Masake okwa pandula ehangano eli eshi ta li lalakanene okushaneka epangelo ondjilakati tashi pitile mokuyambidida eefikola.
Okwa ti omatungo ape otaa ka etele ovanafikola omauwa shaashi paife otava ka longifwa kofikola.
“Osha fimana ngeenge ovanafikola ve na oikwafifohongo shaashi eshi otashi kwafele ovanafikola ve li honge nelitulemo,” ta ti.
Ehongo ola fimana molwaashi olo oshipatululo shonghalamwenyo keshe yokaana. Eshi otashi kwafele okulwifa ondjala noluhepo ngeenge ovanafikola va longwa.
“Omunafikola ngeenge okwa longwa ota dulu okumona oilonga ndele ta yambidida ovakwanedimo vaye,” ta ti.
Omunashipundi wehangano leeshi ledina Okalongo Constituency Fishing Pty, Hanghuwo Jesaya okwa ti ehangano lavo ota li lalakanene okushakena epangelo ondjilakati. Okwa ti paife ngaha ova yambidida eefikola mbali da tungilwa eengulu dipe. “Natango oha tu ka yandja eengulufikola dipe kofikola ikwao omwedi tau ya,” t a weda po ngaho.
Okwa yelifa ta ti ovanafikola ovo ovaleli vokomongula onghee osha fimana ngeenge omahangano taa yambidida eefikola.
Omukulunhufikola pofikola Uahekua Herunga Primary School, Amukete Elago okwa pula omahangano a yooloka, ovanangeshefa, osho yo ovaleli vopapolitika opo e uya okuyambidida ofikola yavo shaashi oya taalela omashongo a yooloka.
“Otwa pumbwa obesa yofikola, onduda yokutalaleka yokutula oikulya yovanafikola unene tuu ombelela noikunwa. Otwa pumbwa yo ongulu yokulila ovanafikola,” ta ti.
Okwa weda po ta ti natango ofikola yavo oya pumbwa omuhandjo wa tungwa u li poshinanena shaashi ovanafikola ohava nangala ashike meebashu.
Elago okwa ti ofikola yaye oi na ovanafikola ve na omikalo nohava piti nawa.
Uahekua Herunga oi li kokumunda Otjolutu moshitukulwa shaMusati. Oi na ovanafikola 600, osho yo omuhandjo wokudja ovanafikola ovo hava di kokule. – fhamalwa@nepc.com.na