Abraham Mwanyekange
Omunambelelwakulunhu wopolifi moshitukulwa shaShana Deputy Commissioner Nico Steenkamp okwa ti oshitukulwa shaOshana oshina ovapolifi voomeme va fika po625.
Steenkamp odo okwe di popya efimbo ta popifa oshihongi shinasha nelelo liwa neemhito da yeulukila eyelaayelo loomeme metanga lopolifi.
Okwa ti momwaalu woomeme o625, omwa kwatelwa ovo tave li yambele opolifi, unene tu ovo hava longo noudinini.
“Omwaalu ou kaufi ashike omwaalu wonafangwa ndele ota ulike eenghono, elongo noudinini nonghee oomeme tava kwafele okukaleka po ombili nelandulafano oshoyo okukaleka omidingonoko detu dina eameno,” ta ti.
Steenkamp okwa weda po ta ti ouleli mOshana ota u li monikila nawa.
“Mopaife otu na ovapedu komufala voomeme vavali, umwe okukwetele
komesho oshilongo shokukelela oimbuluma namukwao oku kwetele komesho oshikondo osho hashi ungaunga noinima yokeengaba, “ ta ti ngaho.
Okwa ti ovo ovaleli vawa noilonga yavo otai vatele opolifi oshoyo oku twa omukumo oomeme vakwao.
Okwa ti moshitukulwa omu na eeinspecta 30, eeinspecta dopombada dili 14, Warrant officer 30, sergeant 50.
“ Eshi ota shi ulike kutya opolifi ota i longo nouyuki momadeulo oshoyo mokuyela yela ovaleli vomeme,” Steenkamp ta holola ngaho.
Steenkemp okwa holola yo kutya movaleli voomeme moshitukulwa ovena mo ovakulunhu voitaashi yopolifi veli vanhe mwa kwatelwa Chief Inspector Regina Silinda oo a kwatela komesho oshitaashi shopolifi mOndangwa.
Okwa ti osho otashi ulike nghee etanga lopolifi ta li yandje oinakuwanifa kovanhu vawa valele inaku talika koukashike kookanhu.
“Shimwe sha ningwa po mOshana okuyelayela Chief Inspector Tuuliki Kashala oo a kwatela komesho oSpecial Reserve Force loshitukulwa shetu,” Steenkamp ta holola ngaho.
Okwa ti osho otashi ulike kutya keshe oilonga ota i dulu okulongwa koomeme.
Okwa weda ko ta ti ovanambelewa voomeme mopolifi yaShana vamwe ova mona yo eemhito dokulonga pondje yoshilongo. Ta ti vamwe ova ka kaleke po ombili nosheendo shongonga hangano yoiwana mounyuni.
Steenkemp okwa ti opolifi oya dana yo onghandangala iwa okunghonopaleka ovanambelewa voomeme, unene ta ti oye va vatela opo va mone ehongo lopombada, evatelo mokuninga omatokolo eli nawa koikondo oko tava wilike.
Steenkemp okwa ti ovapolifi voomeme kave fi ashike oilyo yetanga ndele ota va dana onghandangala metunge po nexumokomesho lopolifi mOshana.
Steenkemp okwa ti oshitukulwa shaOshana osha ulika elineekelo lasho melelo loomeme.
Okwa indila opo oomeme va pewe eemhito da tya ngaho molwaasho ova ulika kutya ota va dulu.