OKONGO – Ouvalelo wowina womaludi wa li kOkongo owa ongela oshimaliwa $497 200 tashi ka longifwa okulongekida oshivilo shomaludi.
Ouvalelo ou owa li ko mexuliloshivike modoolopa yaKongo moshitukulwa shaHangwena. Omaludi otaa tameke momafiku 25-30 Mai 2026.
Omaludi oshivilo shomaulikilo oipindi ounamapya omo ovanafaalama hava eta eengobe davo di ka ludikwe. Eengobe ohadi tulwa mondabo okuninga omafiyafano okutala kutya ilipipo ya ondoka, ya lya nawa.
Ovanahambo ohava kala tava tange eengobe ve udite ombili eshi va lifa nawa oipuka yavo tai vema moshili.
Ovanafaalama natango ohava kala ve na omhito yokulandifa oikunomwa yavo osho yo oimuna komaludi. Neudo omaludi otaa danwa koshi yoshipalanyole “ounamapya nomapashioni otaa kaleke po exumokomesho leliko loshilongo. Omupresidente Netumbo Nandi-Ndaitwah oye kahewa komaludi aa. Omupeduminista mouministeli womidingonoko Anselm Marungu oye a li a kalela po Omupresidente mwaashi okwa li e na oshinakuwanifa koWindhoek koshindingili shoSwapo.
Marungu okwa ti omaludi okwa fimana shaashi otaa yambula po oshikondo shounamapya moshitukulwa shaHangwena.
“Omaludi otaa xwaxwameke ovanafaalama va mone nondjungu noimuna yavo osho yo va kale ve na eudeko kombinga yefimano lounamapya,”ta ti.
Omupeduminista okwa weda po kutya oshivilo shomaludi otashi etele ovanafaalama oukumwe, okukala tava topolelafana omayele nghene ve shi endifa okukala tava muna oimuna yavo.
Okwa kumaida ovanyasha opo va kale tava kufa ombinga koshivilo shomaludi molwaashi otave lihongele ko shihapu. Okwa weda po ta ti natango omaludi otaa etele oshiwana eemhito doilonga pefimbo ovanhu tava landifa oikulya, oimuna noikunwa.
“Ovanhu nava twikile okukufa ombinga mounamapya shaashi oshikondo shounamapya osho shimwe sha fimana moshilongo okuyambula po eliko nokueta po eemhito doilonga,” ta ti.
Murungu okwa ti oshivilo shomaludi otashi ende nawa nokuxuma komesho ngeenge omahangano novanangeshefa tava yambidida omaludi.
“Epangelo otali twikile okuyambidida ovanafaalama vashona komikunda, okuxwaxwamekwa va longe nondjungu shaashi eshi otashi va tu omukumo,” ta ti.
Omunashipundi welelo loshitukukwa shaHangwena noku li kansela woshikandjohoololo shaKongo, Efraim Shipindo okwa ti okudja omudo omaludi a tamekele okwa dana onghandangala yakula okuyambula po odoolopa yaKongo.
“Oshivilo shomaludi osho shimwe sha fimana moshikandjohoololo shaKongo shaashi ohashi tu ovanafaalama vetu omukumo,” ta ti.
Okwa pula ovanafaalama ve li koitukulwa ya yooloka opo va fike komaludi shaashi keshe Omunamibia okwa manguluka oku va waimina.