OSHINGUNGUMA – Ovakwashiwana, ovahongifikola novanafikola ova tumbaleka nokuyandja olupandu kuminista woyeendifo noilonga Veikko Nekundi eshi oministeli yaye ya eta po onhopa ya tungwa ya kaama kombada yomeva opo ovanafikola va dule okuya keetundi.
Etitano Nekundi okwa patulula pambelewa onhopa ya tungwa kofikola Shingunguma Primary moshikandjohoololo shaNgenga moshitukulwa shaHangwena.
Onhopa ei oya tungwa mondobe yomeva pondjila ya uka kofikola.
Ondjila ei paife oi li koshi yomeva sha etwa eshi ondula ya loka unene neudo.
Minista Nekundi okwa ti ombelewa yaye otai lalakanene okuyandjaneka omayakulo koshiwana ngaashi eepate.
Okwa yelifa ta ti ofikola Shingunguma Primary oya pata okudja omwedi Marsa sha etwa eshi eendjila da talama omeva.
“Konima eshi nda lombwelwa kutya ofikola ei oya pata onda ninga onghendabala opo oministeli yange i kale ya tuma ovanhu opo va dule okutunga onhopa ei,” ta ti.
Okwa weda po ta ti onhopa otai tungwa fiyo oposhivelo shofikola.
“Onhopa ei otai kala ya pwa moule womafiku aavali. Osha fimana ngeenge ovanafikola tava i kofikola,” ta ti.
Nekundi okwa kumaida ovakwashiwana vomomudingonoko Shingunguma opo va tonatele nawa onhopa ei.
“Ngeenge odula oya sheka onhopa ei otai di po shaashi otai kala i vakwe po kovakwashiwana,” ta ti.
Okwa weda ko ta ti modula tai ya ngeenge natango oku na omuloka muhapu onhopa otai shuna po. Efiku olo tuu olo, ngoloneya moshitukulwa shaHangwena Kadiva Hamutumwa pamwe naminista Nekundi okwa li tava yelula oilongifo yokunga onhopa ya etwa kololi.
Ngoloneya Hamutumwa okwa pandula minista Nekundi eshi ta longo nondjungu okuyandjaneka omayakulo eepate koshiwana unene tuu eshi ombelewa yaye ya tunga onhopa pofikola. Omukulunhufikola pofikola Shingunguma Primary, Grace Musheko okwa pandula epangelo eshi la eta po onhopa ei shaashi otava ka tameka neetundi davo. Okwa ti ova faneka eetundi opo di tamake moshivike eshi shaashi onhopa oi li pokupwa.
Omunafikola e li mondodo onhihamano, Nelao Hangula okwa ti okwa pandula minista Nekundi eshi a eta po onghendabala yokukonga onhopa.
“Paife otwa pandula eshi hatu ka twikile neetundi detu. Epangelo letu otali longo nondjungu okuyandjaneka omayakulo koshiwana,” ta ti.