OKANGHUDI- Omupresidente mukulu Hifikepunye Pohamba okwa ti okwa limbililwa koiponga yomeepate oyo i li ya indjipala moshilongo unene tuu oiponga oyo ya dipaa ovanhu 20 oshivike dja ko.
Okwa yelifa ta ti eshi otashi dimbulukifa ovaleli kutya oikonga yokuyandja ehongo oya pumbiwa koshiwana osho yo okulongulula eepate. Edi Pohamba okwe di popya mexuliloshivike keumbo laye kOkanghudi pefimbo a talelwa po Omupresidente Netumbo Nandi-Ndaitwah. Omupresidente okwa li aa enda pamwe Omupresidente mukulu Nangolo Mbumba.
Omutumba ou kwa li wa kalwa kovatoolinghundana, ovaleli vokoindo ya yooloka va dja moshitukulwa shaHangwena.
Ashike, konima yomutumba wotete, Omupresidente Nandi-Ndaitwah, Mbumba osho yo Pohamba ova ya momutumba wopaumwene ashike ovo ashike va li mo vatatu. Pohamba okwa popya e li kwatela koshiponga sha dipaa ovannhu vahetatu sha ningwa Etitatu pokati kondjila Arandis noSwakopmund.
Natango Etitatu efimbo longula, ovanhu 11 ova xulifa moshiponga shotuwa pokati kOkahandja nOtjiwarongo.
Osoondaxa okwa lopotwa natango omukainhu a xulifila moshiponga shotuwa koKaribib. Pohamba okwa pula ovashingi veetuwa opo ve li ufe komadiliko oomendjila nokushinga noukeka.
Natango Pohamba, okwa ti okwa limbililwa koshikumungu shomahepeko omomaumbo aa indjipala moshilongo.
Okwa weda po ta ti ounona novakainhu ova ninga oihakanwa yokuhepekwa nokudipawa.
“Ongaa ovaleli otwa pumbwa okukonga omikalo odo tadi kwafele okukelela omahepeko omomaumbo.
Efiku tuu olo, Pohamba okwa pandula Omupresidente Netumbo, Omupedu President Lucia Witbooi osho yo hamushangadjai yoSwapo Sofia Shaningwa molwokulonga nondjungu.
“Onde va pandula shaashi otava longo pauyuuki nelitulemo,” ta ti.
Natango Pohamba okwa ti okwa hafa shaashi oshitukulwa shaHangwena otashi xumu komesho okuyandjaneka omayakulo koshiwana.
Efiku olo Omupresidente Netumbo Nandi-Ndaitwah okwa ti ota landula meemadi dOvapresintende votete shaashi otashi ningi oilonga yaye ipu.
“Ovapresidente ovo kwa li tavalele nale ova ulikila nge oshihopaenenwa shiwa, naashi otashi eta ndi longe nondjungu,” ta ti.
Omupresidente okwa yelifa ta ti elalakano lokutalela Omupresidente mukulu Pohamba okukonga omayelele.
“Ohandi twikile okukala di na ekwatafano liwa nOvapresidente va kulu,” Omupresidente mukulu ta ti.
Omupresidente omutine Nangolo Mbumba okwa okwa pandula Pohamba osho yo omukulukadi waye eshi alushe have vatambulako meumbo lavo okulopolafana omaye nokukaleka po oukumwe.