Abraham Mwanyekange

Ovashikingalo ve fike po487 ova holola tava ka kufa ombinga mefiyafano lekondjelo lepapa la shiivika nawa Ongoma Music Award neudo. Elalakano lOngoma okuyambula po ovashikingalo ovo opo tave ya mowela osho yo ovo va kala mo nale. 

Omwaalu wovashikingalo owa kolekwa komukulunhu wOngoma Ndawana Ndume. Eshi okwe shi holola poshitufi shovaulikwa momapapa Ongoma Etinhe modoolopa yaNdangwa.

Ndume okwa pandula ovashikingalo unene ovo va ulika ekufombinga . Okwa ti eshi otashi ulike nghene ovaimbi va hala okufiyafana po navakwao.

Ovakufi mbinga otava ka fiyafana po momapapa ngaashi: obest newcomer artist of the year, African favourite artist of the year, best afrobeat song of the year, Best album of the year, Best collaboration song of the year, Best GBV song of the year, Best gospel song of the year, Best inspiration song of the year, Best cultural music video of the year, Best music producer of the year, Best traditional song of the year, Best radio presenter of the year

Ngoloneya woshitukulwa shaShana Hofni Iipinge okwa holola kutya Ongoma olweendo olo ta li tyapula ongushu, ounongo oshoyo ewi kOvanamibia. 

Oshitufi osha ulika ovahoololwa momafiyafano omaludi a yooloka. Osho sha ulika eyooloko nongushu yeengalo moNamibia.
Ta ti elitulemo lovashikingalo oli li ondjodi yepangelo okuyambula po nokuxumifa komesho oshikondo sheengalo moshilongo.

“Nena onda hafa okukala ofye ovanelao mokupatulula nokukwatela komesho oshitufi eshi,” ta ti.

 Okwa pandula omapapa eshi eli mangela kumwe nonghalo yanakanena unene eshi tashi linyenge mounyuni. Okwa ti osho otashi eta ekongemo loitalendi sho otashi tumu etumwalaka olo ta li lundulula eenghalamwenyo dovanhu.

“Okupitila mounongo nomokunyanyangida, oha tu dulu oku eta omalunduluko awa, oshoyo exwaxwameko liwa longhalamwenyo komapipi ta eya,” ta ti. Iipinge okwa kumaida ovashikingalo opo ve li tule mo meengalo davo.  “Kamushi ashike ovamwenyeki, nyee ovahokololi vomahepu, ovalongi osho yo ovakaleli po vomufyuululwakalo wetu. Okupitila meengalo deni nena ohamu tu pe omukumo opo tukwa telepo eenghulunghedi detu oshoyo okweeta oshiwana pamwe,” Iipinge ta holola ngaho. 

Iipinge okwa longifa omhito ei ndele ta pula kepangelo osho yo omahangano opaumwene opo a yambidide oyeetwa po ngaashi Ongoma.  Ta ti oikondo yomaunongo oha i kulike eliko loshilongo nohaa yeetapo yo eemhito doilonga moshilongo.

Omukalelipo we hangano lo Namibian Society of Composer and Authors of Music (Nascam) Fredinand Gertze okwa ti Nascam okwa yandja epitikilo opo omapapa aye komesho. 

“Ondiwete ota shi ka kala shiwa unene kehangano. Onga ehangano otwa hala ovashikingalo tava kufa ombinga opo va kale oilyo yetu nonghee ohatu ke vavatela opo tava nyengwa,” ta ti ngaho.

-amwanyekange@nepc.com.na