Ongwediva- Mayola wodoolopa yaNgwediva Naemi Amuthenu okwa ti oifutwa yomayakulo elelo lodoolopa otai ka wedelwa neepelesenda 2,5. 

Amuthenu edi okwe di popya pefimbo ali ta yandje omutengenekwafaneko woshimaliwa shomido 2026/2027, kutya elelo lodoolopa ola ninga eedula da fika puheyali ina li wedela eendado domayakulo. 

“Eshi hatu wedele oifutwa yomayakulo aa haa yandjwa kelelo lodoolopa keshe omwedi osheshi ashike oinima paife oya ninga ondilo, omo mwa kwatela yo omilandu osho yo oipumbiwa aishe yoku eta omakwafo kunye ovakwashiwana,” Amuthenu ta ti. 

Okwa twikila kutya nonande oifutwa ya wedelwa, elelo doolopa onghee ngaho tali twikile nokuyandja omakwafo kovanhu osho yo okuxumifa odoolopa komesho . 

Neudo odoolopa oya pewa oshimaliwa sheemiliona N$201,5. 

Moimaliwa omo omwa teelelwa mudje eemiliona N$30 odo tadi ka longa omeva nolusheno keenhele edi da pumbwa omeva nolusheno modoolopa. 

“Elelo lodoolopa natango ota li ka tula yo omalamba momapandaanda okukaleka po eameno lovakalimo vomodoolopa unene oufiku osho yo okukaleka odoolopa ya yela nawa,” Amuthenu ta ti. 

Eemiliona N$12 oda teelelika di kale da longa odoolopa unene momapandaanda oAbraham Nyambali oshoyo Elyambala. 

Mayola okwa twikila kutya eemiliona N$7, 4 oda tengenekwa di tunge okapale komaudano koMulti-Purpose Center osho yo onhele yomalihafifo. 

Taimihaihambo2000@gmail.com