Abraham Mwanyekange 

Ovakalimo vomomukunda Onambango otava ka tyapula uukumwe, oundjolowele osho yo eyambulepo lovanyasha eshi tava ka unganeka omaudano eengonyo osho yo okatanga kokeemhadi, a lukilwa Omukwaniilwa waNdonga Fillemon Shuumbwa momafiku 13 Juni 2026 pOlunho mOndangwa. 

Omaudano oo a lukilwa Shuumbwa okwa kwatela mo oudano wovakokele vovalumenhu wokatanga kokeemhadi tau danenwa pokapale kaAndimba Sekondele osho yo omaudano eengonyo taa ka ningikwa kUuwa kOnambango. 

Omuunganeki womaudano Johannes Kauluma okwa ti elalakano lokulukila Omukwaniilwa omaudano okuyandja olupandu nefimaneko kofimu yavo. “Omukwaniilwa wetu otwe mu pewa kuKalunga. Oukwatya waye, nokulela kwaye otwe ku hokwa neenghono sho osho nee twa tokola oku mu lukila. 

Kauluma okwa ti omaudano ohaa ningwa keshe kodula mefiku ledalo laye. “Mefiku omu nda dalwa omo ngaho mwa dalwa Omukwaniilwa wetu.” 

Okwa ti ova hala okuyambula po odoolopa yaNdangwa osho yo okuyandja eemhito kovanyasha momaudano, tave shi ningi moku va eta pamwe. 

Omanga kovakokele okwa ti okwa hala va kale ve na oukolele naasho otashi ningwa ashike ngeenge tava kufa ombinga momaudano. 

Oudano wokatanga kokeemhadi okudja peedula 35 okuya pombada oku na ovakokele vOndangwa tava ka taalela Oluno Impact pombali yomutenya nokonima mokapale otamu ka sholokela ovakokele okudja peedula 60 vOnambango Legends ya taalela Namibia Golden Legends. 

Koudano weengonyo, King Fillemon Shuumbwa Boxing Academy otai ka taalela omanyakwa akwao okudja koReal Comouflage Boxing Academy, Chris Junior, Bulelo Boxing Academy, Oshakati, Oshivelo, Rainbow, Intelligence Boxing Academy osho yo Ongenga Boxing Academy. 

Omanyakwa a talika omesho moudano ou ongaashi Lukas Kadhila naMartin Spinks. Omaudano oboksa otaa tameke potundi 17h00. 

-amwanyekange@nepc.com.na