Omukuluntu gwehangano lyi na sha niiponga yomoondjila lyoMotor Vehicle Accidents (MVA) Fund Rosalia Martins-Hausiku okwa ti iiponga yokolupadhi onkene tayi indjipala nonando ya kambadhala oku ya po nooprogalama dhokuhwepopaleka onkalo.

Martins-Hausiku okwa totha mo omaupyakadhi ngoka esiku lyowina lyoshuumbululwa lya li lya ningilwa koWindhoek, nelalakano lyokutaandeleka uuyelele moshigwana.

Okuza momasiku gotango gaJanuali sigo gatatu gaMei nuumvo MVA okwa ndhindhilike iiponga yi li 993, naantu ya ehamekwa ye li 1 636 omanga ye li 170 ya hulitha.

“Oopelesenda dhi li 33 dhiiponga okwa ndhindhilikwa dhaantu yokolupadhi, shoka tashi limbilike nosha pumbwa okutulwa miilonga opo ku kandulwe po iiponga mbyoka tayi faalele oomwenyo dhaantu,” ta popi ngaaka.

Ta ti, oya pumbwa okushuna kwaashoka ya li ya tula miilonga omimvo mbali dha piti sho kwa li iiponga yaayendi yokoompadhi ya li ya shuna pevi oshoka okuza omumvo gwa yi muFebuluali iiponga yaayendi yokoompadhi oya tameke okwiindjipala.

Martins-Hausiku esiku ndyoka okwa li a fatulula kutya konima yoshiponga, ehangano lyawo ohali futu oshimaliwa shefumbiko konima yominute omi-30, uuna oombapila adhihe dha gandjwa osho wo omayambidhidho gokupangwa konima yomasiku gatatu.

“Ohatu vulu okuyambidhidha nuuhaku sigo oposhimaliwa shi thike pomilliona N$1,5. Ashike oshimaliwa shokuyambidhidha nefumbiko oshishona, shi thike ashike poN$7 000,” ta ti ngaaka.

Ta gwedha ko kutya sho osho nee taya kondjitha omilandu noompango dha tulwa po dhi lundululwe, opo oshimaliwa shoka shi gwedhelwe oshoka ihashi kala sha gwana.

Martins okwa ti oya hala oshimaliwa shi thike nando N$20 000.

Ehangano lyi na sha noondjila lyedhina Road Authority (RA) omasiku ga zi ko olya pititha omushangwa tagu kunkilile aahingi yoondjila oonde ya hinge nuukeka. 

RA okwa kunkilile ngaaka konima ya ndhindhilike iiponga ya indjipala mehuliloshiwike lyomasiku gefudhepo lyaaniilonga osho wo Cassinga.

-vkaapanda@nepc.com.na