Ounona veehamba ovo va xupa konima eshi va kupulwa mondobe yomeva kuina paife ova lekelwa mo moshipangelo noha va di naxe keumbo laye. 

Fiyo opapa kape na etomheno kutya omolwashike omukainhu ou a kapulashi ounona vaye mondobe yomeva. 

Ovanamibia mwa kwatelwa Omuprima Elijah Ngurare ova pandula nokutumbaleka okamatyona keedula omu-16 eshi ka longa oshilonga shiwa okuxupifa ounona veehamba, veemwedi omuwoi. Oshiningwanima osha ningwa oshivike sha dja ko komukunda Omutundungu moshitukulwa shaMusati. 

Cornelius Shimwaafeni okwa hokolola ta ti okwa li ta lifa oikombo popepi nondobe yomeva. “Onda mona ashike omukainhu e kwete ounona ndele te va tula mondobe yomeva nokufaduka po,” ta ti. Okwa hokolola ta ti okudja opo okwa endelela ndele ta kufa mo ounona momeva. “Onda li nda kumwa okumona omukainhu ta tula ounona mondobe yomeva. Onda kala ndi li ofika han di mu tale nawa kutya ota ningi shike naana,” ta ti. 

Okamatyona aka oka hokolola taka ti tete oka kufa okaana kamwe ndele natango ta shuna mo a ka tale mo okaana kakwao. “Eshi nda kufa mo ounona onda ya keendingosho di li popepi ndele handi lombwele ovakulunhu kombinga yoshikumungu eshi,” ta ti. Etitatu ngoleneya woshitukulwa shaMusati, Immanuel Shikongo okwa talela po eumbo oko paife haku di ounona ava. 

“Ondalinatangondashakenanokamatyona oko ka xupifa ounona ovo. Okamatyona otaka ulike kutya oke li ependafule shaashi oka longa oshilonga tashi hokifa unene,” ta ti. 

Okwa ti okamatyona aka oka ulika oshihopaenenwa shiwa moshiwana. 

Shikongo okwa kumaida ovakainhu opo alushe va kale tava twala ounona koshipangelo kovaxungimwenyo ngeenge ve lihange inava hala ounona wavo. 

“Ounona kave na ondjo yasha. Itashi ti kutya ngeenge omukainhu vehe liudite naxe yokaana na longele okaana omunyonena,” ta ti. 

Okwa yelifa ta ti koshipangelo oku na ovaxungimwenyo ovo hava yandje omayakulo exungomwenyo ngeenge omukainhu ta hepekwa koupyakadi wopamadiladilo. 

Ina younona veehamba Theresia Johannes weedula 24 okwa anyenwa omhito yokulifutila mo modolongo konima eshi a holoka momhangu yOutapi Omaandaxa. 

Oshibofa shaye osha undulilwa komafiku 3 Sepetemba 2026 nelalakano ku ningwe omakonakono omoule. 

-fhamalwa@nepc.com.na