Elenga enene lyUukwambi osho wo omunashipundi gwomalelo gopamuthigululwakalo gaWambo Ndilimani Herman Iipumbu okwa hiya oshigwana ashihe, opo shi ka tyapulile pamwe oshituthi shomagongo shoka shi li ko ngula.
Oshiindingili shoka hashi ningwa omumvo kehe otashi ka kala kOnamega notashi ka ningwa oshikando oshitiyali tashi ningilwa mUukwambi mondjokonona.
Omupopi gwesiku a simana, Omupresidente gwoshilongo Netumbo Nandi-Ndaitwah, ngoka ta ka enda pamwe naaleli aakuluntu osho wo iilyo yomutumba gwopashigwana, aaleli yopamuthigululwakalo naanangeshefa yoondondo dha yooloka. “Oshituthi shomagongo ohashi yakulwa komalelo agehe gahetatu gomuhoko gwAawambo kuumbangalantu woshilongo, ngaashi lyUukwaluudhi, Ondonga, Oukwanyama, Ongandjera, Ombalantu, Uukolonkadhi, Uukwambi osho wo lyaMbadja,” ta ti ngaaka.
Iipumbu okwa ti, ngaashi shi li onkalondjiigilile, oshituthi shonuumvo osha longekidhilwa owina sho shi hambelele nokutanga omagongo ongoshikunwa shAawambo.
Ta fatulula kutya, oongongo mono omagongo haga kolwa osho wo mono iinima iikwawo hayi kuthwa ngaashi omahuku, odha talika ko ongoshilimbo shopaushitwe mono oonkalamwenyo dhaakalimo yokiitopolwa hoka dhi ikwatelela.
Ta ti uuna gumwe a pogola ethimbo lyomagongo, pamuthika gopamalelo gopamuthigululwakalo ihaku pangulwa oshoka anuwa omupogoli anuwa ke li kuye mwene. “Oompango ndhoka odha zi muuyuni wonale, onkene otwa tsikile nadho sigo onena ongesimaneko lyomuthigululwakalo gwetu,’’ Iipumbu ta popi ngaaka.
Ta ti, oshoka omugongo ohagu kolwa ashike lumwe momvula okuza momwedhi gwaFebuluali, aantu oya kala ashike haya nu omagongo ethimbo ndyoka, ano ohapu piti ethimbo ele inaaya nwa.
“Omagongo oga kala ga talika ko ongoshikolitha, onkene opwa tulwa oompango kutya itaku endwa niilwitho oshoka ngele ya nu ya pitilila otaya pogola. Ndyoka olyo etompelo aantu ihaaya pangulwa ethimbo lyongongola, ohaya tameke nomapangulo konima yomwedhi gwaApiilili,’’ ta popi ngaaka. Okwa gandja oshiholelwa kutya uuna meme a pewa enkawa megumbo pethimbo lyomagongo komusamane, nena Mandala iha pewa mbedhi oshoka otaku fekelwa a nwa ongongola. Omukulupe “Gwiita” Maria Alfeus a yambukile momukunda Okando okwa ti omagongo oshikunwa shimwe shomwaambyoka ya simanekwa moshilongo, ongomulilo gwoshilongo.
“Sho osho shoka to adha oshituthi shoka hashi tyapulwa pamuthika gomalelo gopamuthigululwakalo oshowo kaanenentu yopamuthika gopombanda,’’ ta fatulula ngaaka. “Oshituthi shoka natango ohashi ningwa okukaleka po nokusimaneka omuthigululwakalo. Ootatekulu yonale kaya li ye shi okulesha, onkene okwa li haya tyapula omumvo omupe pamukalo ngoka aluhe muFebuluali,” ta fatulula ngaaka.
Ta ti, okwa li haya koneke kutya uuna taya tyapula esiku ndyoka, oye li momumvo omupe noye li pokulya oshipe.
Alfeus okwa gwedha po ta ti, okwa ndhindhilike kutya omuthigululwakalo inagu simanekwa we, nokwa gandja oshiholelwa ta ti uuna omweenda e ya megumbo, iimbale kakwa li hayi suukulwa kaanona.
Ta ti, iimbale okwa li hayi tentekwa ashike mpoka, ye omukuluntu ta tala kutya ote yi ningi ngiini, oshoka haaluhe omweenda a etelela sha miimbale, ihe ethimbo limwe ohe ya okuhehela pamukalo gu li ngaaka.
-vkaapanda@nepc.com.na