Abraham Mwanyekange

Ofikola yopaumwene yoEbenezer oya kwashilipaleka ehongo loshali kuCornelius Shimwaafeni ou a xupifa ounona vavali veehamba konima eshi va ekelwa momeva kuina oshivike sha dja ko. Ehongo ote li pewa okudja mondodo onhiheyali fiyo ondodo onhi-12.

Omutotipo woEbenezer Mirjam Kaanandunge Amushila okwa lombwela Kundana ta ti omwenyo waye owa enda kwaasho sha ningwa po kuShimwaafeni. “Okwa ninga oshinima sha fimana nonghee okwe lilongela epandulo. 

Kalunga oha pala ondjila okupitila moinina ya yooloka nonghee oshinakuwanifwa shetu opo tu mu pandule,” ta ti. 

Amushila okwa wedako ta ti Ebenezer otai ka yandja ehongo loshali, omuhandjo noilongifomwa aishe yofikola. 

Okwa ti otave ke mu fila oshisho koikwamaadi neefewa. “Shimwaafeni koEbenezer ote ya ko ashike shapo noikumbafa noikutu ndele opuwo, “. Amushila okwa ti Shimwaafeni ota tameke momwedi twa yuka eshi eetundi tadi tameke.

Okwa ti ashishe osho okwe shi ninga molwohole yokaana Okanamibia. 

Okwa ti Shimwaafeni ota ka ninga omu-10 kovanafikola ovo tava fikola oshali poEbenezer.

Cornelius Shimwaafeni (16), omunafikola koprimafikola Nicodemus okwa pewa omapandulo koshiwana konima eshi a longa oilongapondoli. 

Oshiwana paife osha tameka okuyandja omalupandu kependafule molwaoilonga la longa. 

Omayambidido akwao, Monarch Lifeguard oya ti otai pe ependafule odjapo youpendafule konima eshi la longa noudiinini okuhupifa eemwenyo mbali. 

Ehangano ola ti natango otali mu pe omadeulo okuyowa opetameko nokonima otali ke mu pa opondodo yopombada. 

Ovanamibia vahapu ova yandja omalupandu avo kuShimwaafeni ta va ti oye ependafule loshili naasho aninga osha yandja etwomukumo kuvahapu opo vatwikile oku yandja omakwafo opo tama pumbiwa.-amwanyekange@nepc.com.na