Taimi Haihambo
Ominista youhaku moNamibia Dr Esperance Luvindao okwa hoololwa nokuli moshivalo shovakainhu omu-15, ovo tava ka kalela po oilongo yavo komutumba woAmujae.
Omutumba ou ou lile po okufimaneka, okuyandja olupandu nokutwa ovaleli vovavakainhu moilongo yaAfrica omukumo molwoilonga yavo yomupondo.
Luvindao okwa hoololwa, nokudidilikwa molwoilonga yaye yomupondo ei e li ta longele ouministeli wouhaku moshilongo, ongomukulunhu wao nomuleli a kula momutumba wopashiwana nepangelo alishe koonono.
Omutumba ou owa hoolola yo ovakainhu momanenedu a yooloka. MuAfrica, Luvindao oye omuleli wotete munini kovaleli voshikondo shouhaku a hoololwa ongaminista, nokonima yehoololo laye oilonga yaye iwa noyoudiinini oya tameka oku limonikila.
Okudilila kouyelele wa dja kehangano loAmujae, moule wefimbo ashike lishona konima a ulikwa aninge minista wouhaku, okwa yandja nale eemhito doilonga kovakwashiwana ve li 2 000 moshikondo shouhaku, do eepoosa nghee ngaho tadi twikile nokupita.
“Luvindao natango okwa Kandula po omukalo wokulanda omiti tashipitile meekondalaka dihapu oshoyo ovanhu vahapu pomakati opo. Paife ngaha Namibia oha lande omiti ye vene a yukilila oku hadi tekwa, pehena ovatumwa pokati,” ehangano ta li yelifa.
Omukalo ou owa kwafa oshilongo momikalo dihapu, unene ngeenge tashiya pokuxupifa oshimaliwa.
Luvindao oye tuu oo natango okwa eta po yo omilandu dihapu nodipe mouministeli. Dimwe domomilandu dipe ongaashi ovakwashiwana aveshe ava ve na oukalata voMedical Aid yepangelo va kale hava pangwa koipangelo yepangelo. Natango okwa eta yo omalunduluko kuvamwe vomoulikinika va kale hava longo efiku alishe, osho yo okulonga pefimbo lomeetaha. Ehangano eli natango ola holola ekufombinga laLuvindao, pokukalela po oshikondo shouhaku moNamibia pandodo younyuni.
Manga ina waimina oilonga yomutumba wopashiwana, Luvindao okwa tota po ehangano olo hali ufanwa OSAAT Africa Health Foundation, olo li lile po okukwafa ovakwashiwana ava va pumbwa ekwafo louhaku ndele ove li komaushai.
Koshi yehangano eli, okwa eta po omulandu wopashinanena oo hau ufanwa Menga, u na sha nokukwafa ovakalimo vokomaushai oku va kufa omahokololo ouhaku wavo nokuulika omiti edi va pumbwa meendelelo. Luvindao natango mehangano omo oku na opologalama i li koshi yedina laye, i lile po oku kwafa ovakwashiwana noshimaliwa ava va hala oku ke lihongela omaifano a yooloka moshikondo shouhaku, ndele kave na oshimaliwa. Ovakainhu ava tava ka kalela po omutumba ou ove li 15, okudilila moilongo omu-14, yaAfrica. – taimihaihambo2000@gmail.com