Chief Tjinaani Maharero mOmaheke okwa yandja edu leehekita 95 kombelewa yOmupilima shi kunwe oshifukwa shokudja ombuta yeembudufukwa.
Oshivike sha dja ko, omuprima Elijah Ngurare okwa li a ka talela po koshitukulwa shaMaheke, oko a fiya a lombwela ovanafaalama vomomudingono waTjinene va tameke okulongelakumwe mokueta po efakitoli lokuninga ombuta okudilila meembudufukwa.
Nonande minista a li a fiya po elombwelo li li ngaha, kapa li pe na edu lokuninga oshikunino eshi, nokwa li a yandja elombwelo kovaleli vopamufyuululwakalo va yandje edu kovakwashiwana va tameke opoloyeka ei.
Omeemhadi ashike ditalala ye Chief Maharero ota yandje edu loshikunino kovanafaalama vomomukunda Otjombinde, va tameke ounafaalama weembudufukwa.
Ngurare okwa li a yelifa kutya edu lavo oliwa loo oli na oushosho.
Okwa ti okwa hala va longele kumwe novanafaalama vopopepi nomidingonoko davo, mokuyeleka onhele yakula lela shaashi opo i li ya wana nawa, ndele tava tameke oshifukwa lela shakula, tashi dulu okudja eembudufukwa tadi ningwa ombuta.
“Eli eufo la dja komupresident woshilongo NetumboNandi-Ndaitwah, kutya Ovanamibia navadule ko eenghaku ngeenge tashi ya pounamapya, osho yo poku lilongela oikulya yavo kuvo vene,” ta ti.
Ngurare okwa ti Ovakwamaheke oo tave shi endifa nale nawa mounafaalama wavo, ashike okwa hala va tameke oku kala tava kunu omaludi oikulya yayooloka.
“Eshi natango otashi ke mu vatela opo mu kale mu na ouxupilo weni vene wa kola, onye vene mwe u eta po neenghono deni, ndele hakukala mwa tala moikulya ei tai dilile kondje yoshilongo,” ta ti.
Omupilima natango okwa kunghilila ovakwashiwana vaTjinene kelongelokumwe, eudafano nombili pokati kavo, unene ngeenge tashi ya pokunenepeka ounafaalama.
“Ngeenge omu wete tashi nyengana, ile omwa pumbwa ekwafo okudilila kepangelo, omu na oufemba wokupula ekwafo kepangelo,” ta ti.
Ngurare okwa yelifa kutya epangelo olo alike tali shi difa ngeenge kape na ekwafo ile omayele okudilila movakwashiwana.
Okwa ti exumokomesho moshilongo oli na ashike okuholoka po ngeenge ovanhu tava longo ve uditafane vo tava paafana omayele naikwao ya wedwa po.
“Ngeenge ediladilo lokueta po efakitoli lombuta yeembudufukwa ola tu, nena natango omwa teelela mu ka kale mwa yandja eemhito doilonga kovalimovomomidinginoko deni,” ta wedapo.