Omupresidente Netumbo Nandi-Ndaitwah okwa kumagidha aayelele kEkoka moshitopolwa shaHangwena opo yaa longithe we oshimaliwa haya mono komwedhi miinina yaa na ngushu ngaashi iikolitha.
Omupresidente okwa kumagidha ngaaka sho kwa li a telele po aayelele noku ya kumagidha, ya kale taya ilongele yo yene opo ya kale taya hupu nawa.
“Oshimaliwa shoka hamu mono kashi shi shokulanda iikolitha ihe osho ku mu yambidhidha opo mu vule okuhupa. Omalovu kage na uuwanawa washa, ihe ohaga teya po ashike oshigwana,” ta kumagidha ngaaka.
Ta ti, iinima mbyoka kayi li mondjila, onkene nayi mone ehulilo.
“Uuna mu na uudhigu, tu tseyithileni okupitila maaleli yeni ngaashi ookansela, tse tu tale kutya uudhigu otatu wu kandula po ngiini,” ta kumagidha ngaaka.
Nandi-Ndaitwah esiku ndyoka okwa li a topolele aayelele iikulya.
Peneyambeko Kashidulika ngoka e li omukalelipo gwaayelele okwa holola olupandu lwe molwomakwatho ga gandjwa kOmupresidente.
“Otwe mu pandula noonkondo sho mwa etela oshigwana shika shaadhinwa omakumbatha. Oyendji yomuyo otaya mono iihuna, onkene otwa pandula komakwatho ngaka.”Ta ti ngaaka.a
Ta gwedha ko ta ti, nonando aayelele ohaya mono omakwatho ga yooloka, yamwepo yomaagundjuka yaayelele otaya hepeke omakwatho ngoka taya pewa kepangelo, molwashoka oya kwatwa ko unene kombepo yokulanditha.
“Yamwepo yomaakwashigwana ohaya ningi uuna aayelele ya pewa omakwatho gontumba kepangelo, ohaya heke aagundjuka yaayelele opo ye ya faalele omakwatho ngoka, pauvaneko lyomwaalu gwoshimaliwa shontumba, nenge tashi vulika otombo,” Kashidulika ta ti ngaaka.