Auleria Wakudumo 

Otjombinde ǀHûhâsib !Hanab, Omaheke ǀkharib dib ge ǁaupexa 90 sîsenga sîsenose ǁgoe ǂkhamsib !aroma ǂnuwi hâ, ǁnān !Hū!nāsi ǂKhamsib !Oabas tawa ge ǁkhāǁkhākhâide a !khō!oan tsîna !khōǂgā hâse. Nē 1hanab hîa Otjombindes ǀhûhâsib xa !khōdanahe hâs ge ǂhanub ūhâ !hū!nāsi proxramgu !naka mûmûsa !gâi!gâba !hū-omkhâis !nâ ge sī!nâ. 

Hoa 121 ǂgiǂgos ǁhûi!nâǂharidi Namibiab a ǂhabaseb ge ǂhanuba nēti ī omkhâisens proxramga, ǂGuro Ministeri Beros !naka ge tsoatsoa, aitsama ǂûna hōbasens ǂnamipen ǁanǂgāsabena nî mâbasen tsî ǀkhurub huib proxramgu ai nî !gâbasense ǀgui īsa nî ǀûse. Nētsē, ib ge Otjombindes !hanaba ǂgomhe tamab hâse ǀomkhâi tsî ûiga !gâi ǀkhāb !nâ ra dawa, ǂhanub di omkhâisens ǀaweǁguigu !garo!ā ǀkhariga omkhâis digu di !gâi!gâb di sī!nâs mûmûsa ǁgauǁgaus ase. ǂOa ge wekheb di Mantaxtsēs aib ge ǂGuro Ministeri, Elijah Ngurareba nē !hanaba ge sari hâ i tsî ai!gûsab ge mûtoas khao!gâ nēs a ama ûitsama aiǁgau !khaisa gere ǀgomǀgom!gao hîa ǂhanub tsî ǀhûhâsib ga a sîsenǁare sâuǁkhāsib tsî ǀhûhâsib !nâ hâ ǁgoaǂuide oresa hōbas !aroma, o a sī!nâhe ǁkhā !khaisa. 

ǁKhātib ge Ngurareba mâtib ge nē ǂâiǀgaub hîa nētsē buruxa sîsenǂuiba ūhâba a !hui !khaisa gere ǀgoragu. Nē ǂâiǀgaub nē projekde tsoatsoas dis ge, ǁîb ge direkteri ase ai!âkam ge i Ministeris !Hū-omkhâis, ǁGam-i, Haiǀgoms tsî !Hū!âde ǀGoraǂuisa ǁKhawa Kō!gâs dis !naka gere sîsen ǁaeb !nâ ge īsa. Aibe di ge ǁgamǁarede kurin !kharu hâse Otjombindes di ǂgigosi ǀawemā-aob, Wenzel Kavakab ǀkha ge tsoatsoa, mâ ǀgaugu ain ǁnā !â!âb !nâ hâ a ǂûǀorosib, ǀgâsib tsî sîsenosiba nî oe-ams digu ǀkha ǂoaxasa. Kavakab gere mîsa !oas ge nē !hanaǂgās projeksa kai ǀkharaǀkharasiba nē ǁanǂgāsaben ûi gu !nâ ge hā-ū, tsî !gōsase aitsama ǁûn !omgu di ǀhuwuba xun a ûi ǁkhā !khais di amaba ge ǁgau ni. 

Sîseno ǂkhamsib ge nē projeks !nâ-ū nētsē aitsama ra sîsenbasen ts !ā!nāsise hâ ǂharugun tsîn ge nē sîsenaona xu ra domdore. ǂGuro Ministeri ge !hao!nāsi ǂgaeǂguis tsî ǁanǂgāsaben Otjombindes dina koasa ge mā, nē projeksa ǁîxūdī tsîn nētsē ǁnāpa xu !gâiba ra ǀama !khais !aroma. !Hūb a ǂhabase hâ !hao!nāsi ǂgaeǂguideb ge Ngurareba gere ǂgan, nē îxa aiǁgausa ǁgaeǁgae tsî !ereamden tani-ai hâ khoen ûiga !gâi ǀkhāgu ǁga dawas di ǁgūbas ǀkha.