OSHAKATI – Omupedupresidente woshilongo Lucia Witbooi okwa ti okwa shambulwa koshitufi shOshakati Totem Expo, osho a li e ya okunangeka pambelewa Etitano kokapale komaudano aShakati moshitukulwa shaShana.
Witbooi okwa ti okwa ufwa koshipundi kelelodoolopa mokuninga oitufi ya yooloka kuikwao, oyo i li tai tungu oshiwana yo tai kaleke po yo oukumwe, nefimano lomapata osho yo omifyuululwakalo.
“Oshivilo eshi kashi shi ashike shopamufyuululwakalo vali nenge hatu shitale ngaha. Nena osha dala oitaiyi youkumwe, ehongo momifyuululwakalo osho yo eyambulepo leliko lodoolopa,” ta ti.
Okwa twikila kutya oipindi ei oi li po yo okudimbulukifa ovakawashiwana oku va dilila, eedikwa edi va enda nodahala oku tya ngahelipi, oshoyo omakwatafano pokati komapata.
“Natango onda panda yoo ovakalimo vomodoolopa oshoyo vokeedoolopa dopopepi unene ovanyasha, eshi va holola elitulemo lavo moipindi ei, osho tashi ulike kutya ovena ohokwe lela yokushiiva osho tashi linyenge mokati kavo,” ta ti.
Witbooi okwa twikila kutya moNamibia otulimo tu vahapu notwa yooloka, oku dja ashike komalaka aa hatu popi, osho yo omihoko detu nonande twa hangana koshi yepandela limwe.
“Yoo oivilo ngaashi yoludi eli, oyo hai tu dimbulukifa kutya nonande twa hangana koshi yepandela loshilongo, fye natango ovanhu vamwe pamuhoko, no inatu pumbwa okukala twa topoka,” ta ti.
Okwa yelifa kutya Oshakati Totem kai shi ashike yOvawambo, ndele oya nuninwa omihoko adishe moNamibia dikale hadi hangana nokushivafana, do tadi topolelafana ohole noukumwe.
Oipindi ei neudo oi li koshi yexuku tali ti “okunghonopalifa ouukmwe koshi yomifyuulukalo”, osho tashi ulike kutya oipindi ei natango otai kendabala yo okushivifa apa twa dja, nonghee twa kwatafana.
Witbooi okwa ti Oshakati oyo odoolopa imwe ye lipaka moipindi neenghono, i dule okuxumifa apa tai dulu, noye lilongela okupewa ekwafo kepangelo efimbo keshe.
Odoolopa natango oi na edilaadilo lokueta po endiki olo tali kala hali ufanwa Oshakati Totem Expo Centre, olo tali kala hali kaleke po omifyuulwakalo noku di tandavelifa efimbo keshe, naWitbooi okwa ti osho ote shi popile.
Omupedupresidente okwa indila oshiwana shi uye shi yambidide keshe apa tashi dulu moipindi ei, opo ashike odoolopa tai dulu okuya komesho.
-taimihaihambo2000@gmail.com