Omulumenhu weedula 47 okwe lifutila mo modolongo noshimaliwa N$2 000 eshi kwa li a kwatwa po shaashi vati a kwata omukulukadi waye onghonga ndele te mu monifa oshiponga. Okwa holoka momhangu yaShakati Omaandaxa. Oshibofa shaye osha undulilwa komafiku 21 Juli 2026 nelalakano lokuninga omakonakono.

Ota pangulilwa oshibofa shekwatonghonga osho yo oshibofa shomahepeko omomaumbo.

Oshiningwanima osha mexuliloshivike meumbo lavo komukunda Onemedhiya moshitukulwa shaMusati.

Omukulunhu wopolifi moshitukulwa shaMusati Commissioner Irael Basson okwa koleka oshiningwanima eshi.

Okwa hokolola ta ti omutamanekwa ou okwa longifa eenghono eshi a kwata omukainhu waye onghonga.

Opolifi oya hokolola tai ti omulumenhu ou okwa ningila omukulukadi waye omatilifo kutya ote mu dipaa nakatana ngeenge ina hala okuya naye moixulo.

Omutamanekwa ou okwa tameka okudenga omukainhu waye nomanghava moshipala ndele ta mu fangula neenghaku.

Opolifi oya hokolola tai ti konima yefimbo omulumenhu natango okwa kufa omwiya ndele ta denge nekulu laye.

Opolifi oya hokolola tai ovakainhu paife ova ninga oihakanwa yokudengwa kovalumenhu unene tuu ngeenge tava pula vaye navo momilele.

Opolifi oya yelifa tai ti ohashi di kehalo lomukainhu ngeenge okwa hala okuya moixulo ndele haku longifa eenghono.

Ovalumenhu ova kumaidwa opo va xulife po okudenga ovakainhu ngeenge ina va hala okuya moixulo navo shaashi osha puka.

fhamalwa@nepc.com.na