ONGWEDIVA – Omunambelewa konooli wehangano lokuyandja ohonde loNamibia Blood Transfusion Service (NAMBTS) Adolf Mwafangeyo okwa ti ehangano lavo paife ola taalela eshongo linene lomukolo neshikisha wa shunifa eyandjo lohonde pedu.
Meenghundafana a ninga naKundana onghela okwa yelifa ta ti unene pefimbo e li lokufu kuna outalala ovanhu otava ende nakashona okukayandja ohonde.
Okwa ti nena ove li koshipangelo shaNandjokwe okudja potundi 10h00 fiyo 15h30.
Okwa weda ta ti natango nena okudja potundi 10h00 fiyo 18h00 ove li pendiki lomangeshefelo Gwashamba mOndangwa.
“Mongula otu li moshipangelo shaUtapi okudja potundi 10h00 fiyo 15h30,” ta ti.
Okwa pula oshiwana opo shi holoke momwaalu muhapu okukayandja ohonde molwaashi osha fimana.
Okwa hokolola ta ti ohonde ei tai yandjwa koshiwana ohai kwafele ovanhu vena omikifi da yooloka ngaashi okaangela, pefimbo oomeme tava pulumuna, omunhu ngeenge ta tandwa nosho tuu omikifi dikwao.
Okwa weda po ta ti natango, ohonde ohai yandjwa kounona vo va dalwa voupelema shaashi ohava kala va pumbwa ohonde.
Mwafangeyo okwa yelifa ta ti eshi otashi ulike kutya ohonde oya fimana okuxupifa eemwenyo dovanhu ve li moipangelo.
“Ngeenge a tu lombwele oshiwana shi ka yandje ohonde oha shi kala tashi ti pamwe omashendjo. Omunhu ngeenge okwe li hange e li moshipangelo opo ne a kala e na oudeko lefimano lohonde shaashi ye mukwafela,” ta ti.
Okwa lombwela oshiwana opo shitopolafane ouyelele kombinga yefimano lohonde opo ovanhu va kale ve na eudeko la wana nokukala ve na ohokwe yokuyandja ohonde.
Mwafangeyo okwa pula oshiwana opo shi holoke momwaalu muhapu okukayandja ohonde shaashi osha fimana.
Okwa panduala ovanafikola novalihongi aveshe ve na ohokwe yokuyandja ohonde shaashi eshi otashi tu ovanyasha vakwao omukumo.
“Eemwedi da pita otwa didilika oshitukulwa shaHangwena shi li pombada mokuyandja ohonde. Otwa pandula oshiwana,” ta ti.
Okwa ti NAMBTS ota twikile okukwashipaleka kutya ovanhu ve li momhumbwe yohonde koipangelo ova pewa ohonde opo eemwenyo davo di xupifwe.
-fhamalwa@nepc.com.na