Presidente Hifikeepunye Pohamba kageve ruguwo kombudi 12, zondona kazihorokere sikondovike omu kavafire vantu vana siki ko, pokatji ka Kalkrand na Rehoboth monzira zonene zomahauto.Montumwaraka ezi kageve mukuronagosirongo kafatwilire asi ehudi eli limwe lina kara asi lyedona unene mvhura ezi omu tuna kuzumbanesa nomwenyo dononzi ngesi. Mokukwateramo epangero novantu valyo vakaramo mo Namibia nopwa nyamwange, nahara kugava ruguwo rwange ndi asi mbudi zoruguwo zina yuka kekoro lyovazumbanesi ekoro lyawo ntani kwava vana zumbanesa nomwenyo dawo ntani kwava vana zumbanesa nomwenyo dawo kehudi eli lyedona ngesi. Epangero novantu womoNamibia kuna kulira none, nawo kuna kuzuva kukora moomu muna kuzuva one vekoro. Yimo ana kutanta Presidente Pohamba yiyo kahundilire varuganesi nzira unene vasingi vasinge oku tavagazara nokulitura yipo walye nava horako mahudi gamwe. Eparu lyovantu vetu monzira mulyo unene. Yiponye asi vasingi vasikisemo noveta donzira siruwo nasinye. Noveta kwadi tulirapo ditupopere yimo ana kutanta Presidente. Mbudi ezi kazitundilire kwa CoD kazi tente asi ehudi eli kuna kara lyokutupukurura ngova Namibia yipo tukanderere mpora mosirongo. Hamutjanga ntoni gwa CoD Kalla Gertze ogu kakere gumwe ana kutara omu yina kuhoroka oyo yehudi, yige kageve mbudi ozo kovanekoro nokovakaume novakali momukunda ava kavahokwene vawo. Ame yimo nina kuyimona asi twahepa kukanderera mpora nkenye oku tuna kugenda mosirongo esi.Mouvali yipo kayitompokere vaporosi vaNamibia vadimburure owo kava fire mehudi olyo lyomo sondaha. Ava kava fire kuna kara: Johannes Anton 33, Eliaser Moses 7 Julius Kolonelius 39, Helena Uiras 46, Musingi Japhet Karigub 25, Kambonde Ntinda 39, Hendrick Moss 50 na Eva Priscilla Nero 25. Mokukwama yitundwamo yovaporosi mehudi omu kamuhamenene Toyota Hilux, Nissan Almera kazikokere gaToyota zitunde koRehoboth zize koKalkrand ano ogu goToyota yiyokambilikire. Nissani ozo yiyo kazi tjandjukire zika vete mehauto lina kutunda komeho. Mahauto ogo yiyo kagatwerere nokuhwika vamwe owo kavaronderemo dogoro nokuvadimbururasi.