Presidente Thabo Mbeki kava mutambwire pampo mokumupa erwarwa lyegeha agendepo eli lyakara asi kulipa tupu vadiguli ngwendi vapresidente novadinguli vamwe ngoso womulyo.Age kava mutambwire mouvali kaupwire kokapare kaEros apa kaya temberere nodira zendi Falcon 900,kutunda tupu apa kakere meguru novili mbali kutundaoWaterkloof,moPretoria. Sauvali tupu katundire modira alyate pevhu,hawe kagwanekerere nombya ezi vana limbura nomaruvara gerembe lyosirongo saSouth Africa moukwayita.Munekuto Mbeki yipo kamutukukisire mukwawo zendi gwaNamibia kamarada Hifikepunye Pohamba. Navenye vavali ava yiyo kavapirukire vatare kwaSarafina Tshilunga murugani koministeli zeyi yoponze zosirongo koruha roporotocol apa ana kutura mbya kosuta zaMbeki.Makura vapresidente owo vavali yiyo kava zire vatare omu vana dwara vakwayita ava kava kere vana dwara mudwaro gomugeha nomavara nomburukweva donogeha komeho mbunga zeyi yompo vana kutumbura asi Kalahari moyikoverero yompo yiyo kava gevepo marusumo gawo aga ava tambwisa vagenda womulyo. Ano Mbeki yiyo kava mulikidirenye kwankuru Ministera Nahas Angula,Ministera gweyi yoponze zosirongo Marco Hausiku,Ministera goyiviyauka yapresidente dokotora Albert Kawana,Ministera gekungo nepopero Peter Tsheehama,Ministera gonomfi nomarunone dokotora Abraham Iyambo.Vamwe kava kerepo vafumadekwa kava kere ministera ogu ana kererepo varwi vanare dokotora Ngarikutuke Tjiriange,Ministera gonomina Erkki Nghitina,Ministera gonongesefa Immanuel Ngatjizeko,Ministera gekungo nsitwe Willem Konjore,Ministera gona gweyi yoponze zosirongo Lempy Lucas,hamutjanga gokabinete Frans Kapofi novakurona wovaporosi navamwe ngoso. Rugendo rorunene oru karukere novantu vafumadeka mepangero lyaSouth Afrika kamukere ministera gonongesefa,Mandisi Mpahlwa,ministera gonongesefagona Alec Erwin ntani ministera gounsitwe Marthinus Schalkwyk.Mbeki nosigendo sendi yiyo kavavatwere kemunzugo lyenene lyepangero oku kava kavatambwire hena nawa.Apa nye kava kakere kevango olyo lina kara asi paveta lyapresidente gwaNamibia awo kava kakere nomaliyongo gokupira kuzegurukira nkenye ogu.Maliyongo aga kaga kahamenene kounangesefa nokovadinguli ntani asi ngapi nava twara komeho mukaro ogu gwakarapo nare pokatji koyirongo eyi yivali.Konyima nye apa kava gwene muzuhwa konzugo zepangero,Mbeki novantu vendi yiyo kava tengwire koWaterkloof,awo simpe kava vasindikilire mukwawo zendi Presidente gwaNamibia novakabinete Ministera.