WALVIS BAY – Muni gwaMbaye oku na ko omasika gwontumba ngashingeyi oku shi mona mo ngele aakalimo oya hala etotepo lyopolisi yaMuni ngaashi ndjoka yaMuni gwaVenduka nenge inaye yi hala. Muni gwaMbaye okwa gandjele oombapila dhomapulapulo muNovomba okupitila moshikundanekifo she Bay News oshowo moshikundaneki Namib Times shoka hashi monika unene moshitopolwa Erongo. Ombapila yomapulapulo otayi pula aakalimo ya tumbule ngele oya hala okukala nopolisi yoludhi ndoka oshowo kutya oyi ilongekidha okufuta oshimaliwa shi thike peni okuyambidhidha iilonga yopolisi ndjika. Iimaliwa oya yooloka okuza N$60 okuza megumbo kehe, oshowo N$120 sigo N$160 koongeshefa. Pauyelele wOmunambelewa gOmakwatathano muMuni gwaMbaye, Ester Haixwema, iigongi oya ningilwe muKotoba pamwe naayehe mboka ye na eitulomo ngaashi oosikola noongundu dhaagundjuka shi nasha nethaneko okutota po opolisi yaMuni. Haixwema ota ti shi ikwatelela koshizemo shombapila yomapulapulo, otapu ka kongwa ehangano/omuntu ngoka taka ninga omalongekidho gopetameko oshowo etotepo lyomiya dhaShinana dhaMuni gwaMbaye, mwa kwatelwa oshimaliwa shoka tashi ka pumbiwa. Pokati mpoka, yamwe yomaakwashigwana oya holola eyemato lyawo kombinga yomayakulo ngoka haga gandjwa kuMuni miikundaneki yomoshilongo, noya hala aakwashigwana yi imange kumwe nokukondjitha ethaneko ndyoka. Esiku lyahugunina okugandja oombapila dhomapulapulo eti 19 Januali 2007.