Omukiintu gomimvo 34 Omunamibia okwa mangwa nomapangwe ngoka ga adhika mondjato ga mangelwa muupakete wu li 11.

Sha ikolelela komugandji gomauyelele gwopolisi moshilongo Kauna Shikwambi, omukiintu ngoka okwa li a mangelwa peinda lyopolisi mondjila onene pokati kOutjo nOtjiwarongo.

Otaku hokololwa kutya okwa li a adhika niingangamithi yongushu yoshimaliwa N$580 250, yoogalama 11.

Opolisi oya ti omukiintu ngoka okwa li a mangwa po ethimbo olyo tuu ndyoka.

Otaku hokololwa kutya opolisi okwa li ya ningi omboloka pokati kOutjo nOtjiwarongo nokwa li ya hadha ohauto ndjoka yoPolo osiliveli, moka yaadha omapangwe ngoka.

Shikwambi okwa ti otashi limbilike sho aakiintu nayo taya ningi iihakanwa yokwaandjaneka iingangamithi moshilongo. 

Ta ti iingangamithi otayi teya po oshigwana, oshigwana nashi hulithe po onkalo yi li ngaaka.

Opolisi otayi kumagidha oshigwana shi hulithe po okulongitha iingaangamithi oshoka oya nika oshiponga.

“Kehe ngoka ta ka adhika niingangamithi ota ka pewa egeelo lye lya gwana,” opolosi ya ti ngaaka. 

Okwa ndhindhilikwa kutya aakwiilongo oyo haya yakele iingangamithi moshilongo, nonando oye shi kutya inayi pitikilwa mo. 

Aanona oyendji oya thigi po oosikola, ya yi momapandaanda, omolwiingagamithi taya longitha, noya ningi iihakanwa.

“Aanona aashona ye li moongundu dhopevi lela, oya tameka nale okulongitha iingangamithi,” ta yi ti ngaaka.

Aanyasha oya hanagulwa po kiingangamithi, neilongo kaye na nalyo, oshoka oonkalamwenyo dhawo oye dhi tula miingangamithi. 

Opolisi otayi kumagidha oshigwana shi kale aluhe tashi lopota mboka nenge ngoka ta landitha iingangamithi.

Tayi ti, aantu mboka inaya pumwa okukala moshigwana otaya teyagula po oshigwana shokomongula, onkene oya pumbwa okukala moondjedhililo.

Oomwedhi dha zi ko, omukiintu gomimvo 29 omukwashigwana gwaTanzania okwa li a mangwa niingangamithi yi li molupe luusila, ano ococaine.

Sha ikolelela kepeko lyopolisi, omukiintu ngoka okwa li a mangelwa mondoolopa yaSwakopmund moshitopolwa shErongo.

Otaku hokololwa kutya okwa li a adhika niingangamithi yongushu yoshimaliwa N$21 600, yoogalama 36.

Opolisi oya ti, omukiintu ngoka okwa li a mangwa po konima opolisi kwa li ya nothelwa ko. 

-vkaapanda@nepc.com